سابق گلوکارہ رابی پیرزادہ نے کہا ہے کہ میں ماضی میں حجاب والی خواتین سے دور ہوجایا کرتی تھی۔

حال ہی میں اپنے دیئے گئے ایک انٹرویو میں رابی پیرزادہ کا کہنا تھا کہ وہ ماضی میں جب بھی کسی باحجاب خاتون کو دیکھتی تھیں تو ان سے دو قدم دور کھڑی ہوجاتی تھیں اور اب ان سے بولڈ لباس والی خواتین دور ہوجاتی ہیں۔

انہوں نے بتایا کہ جب ان کے خلاف سوشل میڈیا پر مہم چلائی گئی تو ان کے اپنے بھی ان سے نفرت کرنے لگے اور وہ لوگ بھی ان کا ساتھ چھوڑ گئے، جنہیں وہ اپنا سب سے بہترین محسن سمجھتی تھیں۔

ان کا کہنا تھا کہ بس صرف والدین ہی ان کے ساتھ کھڑے رہے اور وہ دعا کرتی ہیں کہ ان جیسے والدین خدا ہر کسی کو عطا کرے۔

سابق گلوکارہ نے کہا کہ اگرچہ انہوں نے حجاب پہننا شروع کردیا ہے، تاہم اب بھی وہ وہی رابی پیرزادہ ہیں جو پہلے ہوتی تھیں، وہ اب بھی حجاب کے دوران سر کے پہلے حصے کے بال اس لیے کھلے رکھتی ہیں کہ وہ ہر وقت ایسی ہی رہتی ہیں، ان سے کیمرے کے سامنے ان بالوں کو چھپایا نہیں جاتا۔

انہوں نے کہا کہ اگرچہ وہ اب حجاب کرتی ہیں، تاہم ان کے ڈرائیور اور باورچی بھی غیر محرم مرد ہیں، اس لیے جیسا وہ ان کے سامنے پردے میں رہتی ہیں، ویسا ہی دنیا کے سامنے رہتی ہیں، ساتھ ہی انہوں نے دعا کی کہ خدا انہیں مکمل طرح پردہ کرنے کی توفیق عطا کریں گے۔

ان کا کہنا تھا کہ اب میں سوچتی ہوں تو انہیں سمجھ آتا ہے کہ درحقیقت با پردہ خواتین ہی خوبصورت لگتی تھیں، انہیں تو مختصر یا بولڈ لباس کی وجہ سے ہر کوئی آسانی سے دیکھ لیتا تھا۔

رابی پیرزادہ نے کہا کہ ماضی میں جب کوئی انہیں عمرے پر جانے کی تجویز دیتا تھا تو وہ انہیں کہتی تھیں کہ وہ کیوں عمرے پر جائیں؟ اس وقت وہ سوچتی تھیں کہ ان کی عمر نہیں ہوئی عمرے پر جانے کی مگر اب ان کی خواہش رہتی ہے کہ وہ صرف مکہ و مدینہ ہی دیکھتی رہیں۔

سابق گلوکارہ رابی پیرزادہ کا مزید کہنا تھا کہ وہ اکیلی چار افراد کا کھانا کھا جاتی ہیں جبکہ انہیں مٹھائیاں بہت پسند ہیں اور بیک وقت ڈیڑھ کلو مٹھائی تک کھا جاتی ہیں۔

واضح رہے کہ رابی پیرزادہ نے نومبر 2019 میں ویڈیوز لیک ہونے کے بعد شوبز چھوڑ دی اور اب مذہبی تعلیمات کے مطابق زندگی گزار رہی ہیں۔