پاکستان شوبز انڈسٹری کی اداکارہ رابعہ کلثوم نے بتا دیا کہ اُن کی والدہ نے انہیں اداکاری سے کیوں منع کیا تھا۔

حال ہی میں اپنے دیئے گئے ایک انٹرویو میں اداکارہ نے انکشاف کیا کہ ان کی والدہ اداکارہ پروین اکبر کو ان کے شوبز میں کام کرنے پر اعتراض تھا۔

اداکارہ نے بتایا کہ ان کی والدہ نہیں چاہتی تھیں کہ وہ انڈسٹری میں کام کریں، انہوں نے وجہ بتاتے ہوئے کہا والدہ جس وقت سے انڈسٹری میں کام کر رہی ہیں اس وقت اس شعبے میں لڑکیوں کا کام کرنا معیوب سمجھا جاتا تھا۔

ان کا کہنا تھا کہ اسی لیے ان کی والدہ کے دل میں ڈر تھا کہ انہوں نے جن چیزوں کا سامنا اپنے زمانے میں کیا ہے یا جن حالات سے وہ گزری ہیں، ان چیزوں اور حالات سے میری بیٹی کو بھی گزرنا پڑے گا۔

رابعہ کلثوم نے کہا کہ ہر کام کرنے والی عورت کے مختلف تجربات ہوتے ہیں، کسی کے مثبت تو کسی کے منفی، اگر اس نظریے کو لے کر بات کریں تو میں اپنی والدہ کے فیصلے سے متفق ہوں۔

انہوں نے کہا کہ اُن کا فیصلہ اس وقت بالکل صحیح تھا جس وقت میں نے آنے کی خواہش ظاہر کی تھی، یہی بنیادی وجہ تھی اور میں اس کا بہت احترام کرتی ہوں۔

دورانِ انٹرویو میزبان نے اداکارہ سے سوال کیا کہ اعتراضات کے باوجود آپ انڈسٹری میں کیسے آئیں؟

 جواب میں اداکارہ کا کہنا تھا کہ ان کی شادی ہوگئی اور ان کے شوہر بہت ساتھ دینے والے انسان تھے، اس لیے انہیں مشکل نہیں ہوئی۔

واضح رہے کہ اداکارہ رابعہ کلثوم متعدد ڈراموں میں اپنی کارکردگی کے جوہر دکھا چُکی ہیں۔

رابعہ کلثوم سینئر اداکارہ پروین اکبر کی بیٹی، فیضان شیخ کی بہن اور اداکارہ ماہم عامر کی نند ہیں۔