پاکستان کی معروف اداکارہ اور فلم ساز سکینہ سموں کی پہلی فیچر فلم انتظار ریلیز کے لیے تیار ہے۔

سکینہ سموں نے فوٹو اینڈ ویڈیو شیئرنگ ایپ انسٹا گرام پر فلم کا پوسٹر شیئر کرتے ہوئے لکھا کہ میرا خواب بالآخر جلد ہی حقیقت بننے جا رہا ہے، ملک بھر میں رواں ماہ میری فلم سنیما اسکرین پر دیکھی جا سکے گی۔

اداکارہ نے لکھا کہ میں انتظار کو پہلے ہی سنیما گھروں میں ریلیز کرنا چاہتی تھی مگر کورونا کی وجہ سے ایسا ممکن نہ ہوسکا لیکن اب شائقین بڑے پردے پر یہ فلم دیکھ سکیں گے۔

یاد رہے کہ اس فلم کا ٹریلر 2020 میں جاری کیا گیا تھا مگر کورونا وائرس کی وجہ سے فلم ریلیز نہیں ہو سکی تھی۔

فلم انتظار کو امریکا میں 2020 ہونے والے ہارلم فلم فیسٹیول میں پیش کیا گیا تھا، جہاں مذکورہ فلم بیسٹ ایکٹر کا اعزاز اپنے نام کرنے میں کامیاب ہوئی تھی۔

فلم کی کاسٹ میں ثمینہ احمد، خالد احمد، کیف غزنوی، رضا علی عابد اور عدنان جعفر شامل ہیں جبکہ کہانی بی گل نے لکھی کی ہے۔

فلم انتظار 19 اگست کو پاکستان بھر کے سنیما گھروں کی زینت بنے گی۔