قتل کے الزام میں نامزد 30 سال سے مفرور بھارتی اداکار کو گرفتار کرلیا گیا ہے۔

 بھارتی میڈیا  رپورٹس کے مطابق  اداکار کو ریاست ِہریانہ کی اسپیشل ٹاسک فورس (ایس ٹی ایف) نے پیر کے روز گرفتار کیا۔

اوم پرکاش المعروف پاسا نامی یہ اشتہاری ملزم ایک فوجی تھا جسے 1988 میں فوج سے نکال دیا گیا تھا۔

اس کی گرفتاری سے متعلق ہریانہ پولیس کے ترجمان کا کہنا ہے کہ اشتہاری ملزم 2007 سے فلموں میں کام کر رہا ہے اور اتر پردیش کی 28 فلموں میں اداکاری بھی کرچکا ہے۔

انہوں نے کہا کہ اوم پرکاش ضلع پانی پت کا رہنے والا ہے جبکہ یہ قتل، اقدام قتل اور چوری کے کئی کیسز میں بھی مطلوب تھا۔

یہ شخص اپنی شناخت تبدیل کرکے ضلع غازی آباد میں رہائش پذیر تھا جس کی اصل وجہ ان کیسز سے پولیس کی آنکھوں میں دھول جھونکنا تھا۔

پولیس حکام کا کہنا ہے کہ ابتدائی تفتیش میں یہ بات سامنے آئی ہے کہ اوم پرکاش کا نام جرائم کی دنیا میں اس وقت سامنے آیا جب وہ آرمی کا حاضر سروس اہلکار تھا اور ڈیوٹی سے غائب ہونے پر اسے 1988 میں سروس سے برخاست کردیا گیا تھا۔

انہوں نے یہ بھی بتایا کہ اوم پرکاش نے ایک ڈکیتی کے دوران 1992 میں ایک شخص کو قتل کردیا تھا اور اس سلسلے میں اس وقت اس کے خلاف مقدمہ بھی درج کروایا گیا تھا، تاہم اس کے بعد اس نے اپنا نام تبدیل کیا اور غازی آباد میں رہائش پذیر ہوا۔