ہالی ووڈ اداکارہ اور اقوام متحدہ کی خصوصی سفیر انجلینا جولی نے ایران کی خواتین کے لیے خصوصی پیغام جاری کیا ہے۔

اداکارہ کی جانب سے فوٹو اینڈ ویڈیو شیئرنگ ایپ انسٹاگرام پر ایرانی لڑکی کی ہلاکت کے بعد ہونے والے احتجاجی مظاہروں کی چند تصاویر شیئر کی گئی ہیں۔

انہوں نے اپنی پوسٹ میں ایران کی خواتین کے ساتھ یکجہتی کا اظہار کرتے ہوئے لکھا کہ وہ ایران کی بہادر، غیرت مند، اور نڈر خواتین کا بہت احترام کرتی ہیں۔

انجلینا جولی نے لکھا کہ مہسا امینی، اس جیسے تمام تر نوجوان، وہ جو آج سڑکوں پر احتجاج کرتے نظر آرہے ہیں اور کئی دہائیوں سے زور زبردستی کےخلاف مزاحمت کر رہے ہیں، انہیں ڈر اور خوف کے بغیر جینے اور سانس لینے کی آزادی چاہیے۔

واضح رہے کہ انجلینا جولی پاکستان میں مون سون کی بارشوں اور سیلاب سے ہونے والی تباہ کاریوں کا دورہ کرنے پاکستان آئی تھیں۔