معروف پاکستانی ٹک ٹاکر ندیم نانی والا نے اپنی گرفتاری سے متعلق حقیقت بتا دی۔

تفصیلات کے مطابق ندیم نانی والا نے اپنے جاری کردہ ایک بیان میں بتایا کہ مجھ پر اغوا کا جھوٹا مقدمہ درج کروایا گیا، ایک یوٹیوبر نے گھر کی خواتین پر ویڈیو بنائی، ایسا کرنے سے روکنے پر اغوا کا پرچہ کروا دیا گیا۔

ان کا کہنا تھا کہ پیر کے روز عدالت نے مجھ پر ہونے والی ایف آئی آر خارج کردی، ایک دو روز تک جھوٹی ایف آئی آر کروانے والے شخص کے خلاف پولیس سے رابطہ کریں گے۔

واضح رہے کہ یوٹیوبر کو اغوا کرنے کے الزام میں معروف پاکستانی ٹک ٹاکر ندیم نانی والا کو گرفتار کیا گیا تھا۔

پولیس کے مطابق پاکستان کے معروف ٹک ٹوکر ندیم مبارک عرف “نانی والا” اور ان کے ساتھیوں کو مبینہ طور پر یوٹیوبر احمد علی کو اغوا کرنے کی کوشش کے الزام میں حراست میں لیا گیا تھا۔

رپورٹس کے مطابق یوٹیوبر کو ندیم مبارک نے پہلے ڈرایا اور ایک حالیہ آن لائن ویڈیو میں انہیں جھگڑے پر اکسایا۔

بعد ازاں ٹک ٹاکر اور اس کے چار ساتھیوں نے سیالکوٹ سے ڈسکہ کا سفر طے کر کے یوٹیوبر احمد علی اور ان کے بھائی کو اغوا کرنے کی کوشش کی جبکہ یوٹیوبر کا بھائی موقع سے فرار ہونے میں کامیاب رہا۔

متاثرہ کے بھائی کی شکایت پر پولیس نے کارروائی کرتے ہوئے دفعہ 365 کے تحت مقدمہ درج کیا تھا۔