پاکستان کی معروف اداکارہ صبور علی نے اپنے شوہر و اداکار علی انصاری کی 35 ویں سالگرہ پر دلچسپ سرپرائز دے دیا۔

اداکارہ نے اپنے تصدیق شدہ انسٹاگرام اکاؤنٹ پر ایک ویڈیو شئیر کی ہے جس میں صبور نے علی انصاری کی سالگرہ کے لیے انہیں سرپرائز دے کر حیران کردیا۔

وائرل ویڈیو اور تصاویر میں دیکھا جاسکتا ہے کہ علی انصاری سرپرائز برتھ ڈے پر کتنا خوش ہیں۔

ویڈیو میں علی انصاری کو کیک کاٹتے اور صبور کے ساتھ شرارتے کرتے ہوئے بھی دیکھا جاسکتا ہے۔

سوشل میڈیا پر دونوں اداکاروں کے مداحوں کی جانب سے ان تصاویر اور ویڈیوز کو بہت پسند کیا جارہا ہے اور دعائیں بھی دی جارہی ہیں۔

اس سے قبل اداکارہ نے اپنے دیئے گئے ایک انٹرویو میں شادی کے بعد زندگی میں آنے والی تبدیلیوں پر بات کی تھی اور ساتھ ہی انہوں نے شوبز کے حوالے سے بھی کھل کر باتیں کیں۔

ان کا کہنا تھا کہ میں اور علی انصاری ساتھی اداکار کے طور پر ملتے رہتے تھے اور انہوں نے متعدد دوستوں کی شادیوں میں ایک ساتھ ڈانس بھی کیے مگر ان کے درمیان رومانوی تعلقات نہیں تھے۔

انہوں نے کہا کہ ان کی سہلیاں اور علی انصاری کے دوست انہیں چھیڑتے رہتے تھے اور دونوں پر الزام لگاتے تھے کہ ان کے درمیان تعلقات ہیں حالانکہ انہوں نے کبھی ایک دوسرے کو رومانوی نظر سے نہیں دیکھا تھا۔

صبور علی نے بتایا کہ علی انصاری کی بہن مریم انصاری بھی انہیں بولتی رہتی تھیں کہ ان کے بھائی کے لیے کوئی لڑکی دیکھو اور بعد ازاں انہیں ہی وہ کہتی تھی کہ تم ہی علی سے شادی کرلو۔

اداکارہ کا کہنا تھا کہ متعدد اداکاراؤں اور اداکاروں نے ان دونوں کو ایک دوسرے سے محبت کرنے کا مشورہ بھی دیا لیکن اس باوجود دونوں ایک دوسرے سے محبت کرنے کو تیار نہ تھے۔

انہوں نے کہا کہ میں خود علی انصاری کو کافی بار متعدد لڑکیوں سے محبت اور شادی کی تجاویز دیتی رہتی تھیں مگر دوسری لڑکیاں مجھے کہتی تھیں کہ تم علی سے شادی کر لو۔

صبور علی نے بتایا کہ انہوں نے ایک دن تمام سہیلیوں اور دوستوں کے ہمراہ علی انصاری کے ساتھ بیٹھ کر صاف صاف گفتگو کی اور واضح کیا کہ وہ محبت کے چکر میں نہیں پڑیں گی وہ براہ راست شادی کریں گی۔

اداکارہ کا کہنا تھا کہ ان کی وضاحت کے بعد علی انصاری بھی ٹھیک ہوگئے اور ان کی بہن مریم انصاری نے پہلے ہی سجل علی سے رشتے کی بات کرلی تھی اور پھر علی انصاری ان کے ہاں رشتہ لے کر آگئے اور دونوں کی شادی ہوگئی۔

انہوں نے کہا کہ علی انصاری اپنی والدہ اور بہن مریم انصاری کی بہت عزت کرتے ہیں اور اسی وجہ سے وہ انہیں پسند آگئے کیوںکہ جو شخص اپنی بہن اور والدہ کی عزت کرتا ہو، وہ بیوی کی بھی کرتا ہے۔

صبور علی نے بتایا کہ شادی کے بعد اب لوگ انہیں کہتے رہتے ہیں کہ علی کے ساتھ سوشل میڈیا پر تصاویر اور ویڈیوز شیئر نہیں کیا کرو، نظر لگ جائے گی۔

پاکستان شوبز انڈسٹری کی معروف اداکارہ صبور علی کا مزید کہنا تھا کہ علی انصاری بہت ہی رومانوی شخص ہیں اور انہیں ہر روز سرپرائز دے کر ان کی زندگی خوشیوں سے بھر رہے ہیں اور وہ اس پر جتنے بھی شکرانے ادا کریں وہ کم ہیں۔

واضح رہے کہ صبور اور علی انصاری نے جنوری 2022 میں شادی کی تھی، شادی کے بعد دونوں اسکرین پر کم دکھائی دیتے ہیں۔