پاکستانی معروف میزبان و ماڈل متھیرا نے اداکارہ ہانیہ عامر کو ڈانس ویڈیو پر آڑھے ہاتھوں لے لیا۔

گزشتہ روز سوشل میڈیا پر ہانیہ عامر کی ایک ویڈیو وائرل ہو گئی تھی جس میں انہیں  بالی ووڈ فلم ہائی وے کے گانے کے ریمکس ورژن پر ڈانس کرتے ہوئے دیکھا جاسکتا ہے۔

ویڈیو وائرل ہوتے ہی جہاں دیگر لوگوں نے ناراضگی کا اظہار کیا وہیں متھیرا نے بھی ہانیہ عامر کو آڑھے ہاتھوں لے لیا۔

متھیرا نے اپنے سوشل میڈیا اکاؤنٹ پر ہانیہ کی ڈانس ویڈیو کے لیے گانے کے انتخاب پر مایوسی اور ناراضگی کا اظہار کرتے ہوئے کہا کہ آپ اس گانے پر ڈانس نہیں کر سکتیں، مجھے یہ ایک بے عزتی لگی کیونکہ یہ ایک صوفی گانا ہے اور اس کا نام مولا علی ہے۔

انہوں نے لکھا کہ مجھے ڈانس پسند ہے اور وہ بہت پیاری لگ رہی ہیں لیکن گانے کا انتخاب پسند نہیں آیا اور کوئی بھی مسلمان جو مولا علی کا احترام کرتا ہے وہ اس طرح کی حرکت نہیں کرے گا۔

اس سے قبل اداکارہ متھیرا نے اپنے انسٹاگرام اکاؤنٹ پر بھارتی کھلاڑی ویرات کوہلی کا ایک بیان شیئر کیا تھا اور اس کے کیپشن میں لکھا تھا کہ یہی وجہ ہے میں اس کی فین ہوں۔

 بھارتی کھلاڑی ویرات کوہلی نے پاکستان سے ہارنے کے بعد بیان دیا تھا جس میں انہوں نے کہا کہ دینے والا اوپر والا ہے آپ جتنے بھی ہاتھ پاؤں مار لو جب اوپر والا چاہے گا تو ہی کامیابی ملے گی۔

انہوں نے کہا کہ میں اسی بات پر یقین رکھتا ہوں اور میں اپنی زندگی ایسی ہی کھیلتا اور جیتتا ہوں۔

گزشتہ دنوں متھیرا نے اپنے انسٹاگرام اکاؤنٹ پر ایک ویڈیو شیئر کی تھی۔

شیئر کی گئی ویڈیو میں متھیرا نے پہلے اپنے قیمتی زیورات اورسرخ رنگ کا لباس دکھایا جس کو وہ زیب تن کرنے والی تھیں۔

معروف  اداکارہ نے اس کے  کچھ لمحے بعد وہی گہنے اور لباس زیب تن کیا جسے مداحوں کی جانب سے خوب پسند کیا گیا۔

واضح رہے کہ متھیرا نے ’ناگن‘، ’راستہ‘ اور کئی مشہور فلموں میں اپنی اداکاری کے جوہر دکھائے ہیں۔