برطانیہ کی ملکہ الزبتھ دوم کی وفات پر شوبز ستاروں نے اظہارِ افسوس کیا ہے۔

رپورٹ کے مطابق 70 سال تک حکومت کرنے کے بعد ملکہ الزبتھ  96 سال کی عمر میں گزشتہ شب بالمورل میں انتقال کر گئیں۔

ملکہ کی وفات پر جہاں سب لوگ افسردہ ہیں وہیں شوبز شخصیات بھی ملکہ کے ساتھ اپنی تصاویر شیئر کرتے ہوئے افسوس کا اظہار کر رہی ہیں۔

بالی ووڈ اداکارہ شلپا  شیٹی نے ملکہ برطانیہ کو خراجِ تحسین پیش کرتے ہوئے ان کے ساتھ ملاقات کی ایک یادگار تصویر اپنی انسٹا اسٹوری پر شیئر کی ہے۔

انہوں نے ساتھ میں لکھا کہ آپ کی زندگی کیسی ناقابل یقین حد تک متاثر کن رہی، ایسی شاندار  صحبت میں ہونا اعزاز کی بات تھی۔

برطانوی گلوکار ایلٹن جان، ماڈل و اداکارہ  کلا کاردیشین نے بھی انسٹاگرام اسٹوری پر ملکہ کی موت پر اظہارِ افسوس کرتے ہوئے انہیں خراج ِ تحسین پیش کیا ہے۔

چیئر مین  پی ٹی آئی عمران خان کی سابق اہلیہ جمائمہ گولڈ اسمتھ نے بھی سوشل میڈیا پر ملکہ برطانیہ سے ملاقات کی ایک تصویر شیئر کی ہے۔

انہوں نے تصاویر کے ساتھ کیپشن میں لکھا کہ ہماری پیاری ملکہ کی موت پر شاہی خاندان کے ساتھ گہری تعزیت، جس نے عوامی زندگی میں تمام اہم اور تیزی سے نایاب خصوصیات فرائض ، شائستگی، نظم و ضبط، وقار، عزم، مستقل مزاجی کو مجسم کیا۔

مشہور ویب سیریز اسٹرینجرتھنگز میں مرکزی کردار ادا کرنے والی امریکی اداکارہ ملی بوبی براؤن نے بھی سوشل میڈیا پر ملکہ الزبتھ کی تصویر شیئر کرتے ہوئے ان کی موت پر دلی افسردگی کا اظہار کیا ہے۔

بھارتی اداکارہ کرینہ کپور خان ،انوشکا شرما، سشمیتا سین اور کمال حسن سمیت متعدد بالی ووڈ ستاروں نے ملکہ الزبتھ کے آخری سفر کے لیے دعا کی اور ان کی موت پر افسوس کیا۔

یاد رہے کہ ملکہ برطانیہ الزبتھ دوم 96 برس کی عمر میں انتقال کرگئی ہیں۔

ملکہ کو پچھلے سال اکتوبر سے صحت کے مسائل کا سامنا تھا جس کے باعث انہیں چلنے پھرنے اور کھڑے ہونے میں مشکل پیش آتی تھی۔

برطانیہ الزبتھ کی تدفین لندن برج آپریشن کے خصوصی منصوبے کے تحت سر انجام پائے گی جبکہ ملکہ کے انتقال پر دس روزہ سوگ کا اعلان بھی کر دیا گیا ہے۔

واضح رہے کہ ملکہ برطانیہ کے انتقال کے بعد شہزادہ چارلس، بادشاہ چارلس بن جائیں گے اور ڈچز آف کارنوال کامیلا کو ملکہ کا درجہ مل جائے گا۔