پاکستان شوبز انڈسٹری کی خوبصورت اور مشہور اداکارہ مشال خان نے حکومت سے گدھوں اور کتوں کو برآمد نہ کرنے کی اپیل کردی ہے۔

حال ہی میں حکومتِ پاکستان کی جانب سے چین کو گدھے اور کتے برآمد کئے جانے کی خبروں پر سوشل میڈیا صارفین کا ردِ عمل سامنے آیا۔

کئی سوشل میڈیا صارفین اس اقدام سے خوش نظر آئے جبکہ متعدد صارفین تعجب کا شکار ہیں کہ چین کو گدھوں اور کتوں میں اتنی دلچسپی کیوں ہے؟

اس حوالے سے معروف اداکارہ مشال خان نے سوشل میڈیا کی فوٹو اور ویڈیو شیئرنگ ایپ انسٹا گرام پر اسٹوری اپ ڈیٹ کی جس میں اُنہوں نے حکومتِ پاکستان کے اس اقدام کی شدید مذمت کی ہے۔

انہوں نے حکومت سے اپیل کی کہ ملک میں موجود گدھوں اور کتوں کو کسی بھی ملک کو برآمد نہ کیا جائے۔

واضح رہے کہ چین نے پاکستان سے گدھے اور کتے درآمد کرنے کی خواہش کا اظہار کیا ہے۔

خبر رساں ادارے کے مطابق سینیٹ کی قائمہ کمیٹی برائے تجارت نے انکشاف کیا ہے کہ چین پاکستان سے گدھے اور کتے درآمد کرنے کا خواہاں ہے۔

سینیٹ کی قائمہ کمیٹی برائے کامرس کا اجلاس سینیٹر ذیشان خانزادہ کی زیر صدارت منعقد ہوا تھا جس میں وزارت تجارت کے حکام نے برآمدات اور درآمدات کے حوالے سے بریفنگ دی تھی۔

بریفنگ کے دوران وزارت تجارت کے حکام نے بتایا تھا کہ چین پاکستان سے گدھے درآمد کرنا چاہتا ہے جبکہ چین گوشت برآمد کرنے کی ایک بڑی مارکیٹ ہے۔

رپورٹ کے مطابق اجلاس کے دوران کمیٹی کے رکن دنیش کمار نے بتایا تھا کہ چین پاکستان سے گدھے اور کتے برآمد کرنا چاہتا ہے۔

اجلاس کے دوران رکن کمیٹی مرزا محمد آفریدی نے کمیٹی کو مشورہ دیا تھا کہ افغانستان میں جانور سستے ہیں کیونکہ وہاں خریدار موجود نہیں لہذا افغانستان سے جانور درآمد کر کے گوشت برآمد کیا جاسکتا ہے۔