پاکستان شوبز انڈسٹری کی سینیئر اداکارہ عتیقہ اوڈھو نے نوجوان خواتین کو انتہائی اہم مشورہ دے دیا ہے۔

حال ہی میں اداکارہ نے سوشل میڈیا کی فوٹو اور ویڈیو شیئرنگ ایپ انسٹاگرام اکاؤنٹ پر ایک تصویر شیئر کی جس میں انہوں نے اُن تمام خواتین کو تعلقات کو ختم کرنے کا مشورہ دیا جن کے ساتھ ان کے شریک حیات یا پارٹنر تضحیک آموز رویہ اختیار کرتے ہیں۔

انہوں نے اپنی پوسٹ میں لکھا کہ وہ خود جوانی میں ایسے رشتوں اور تعلقات کی وجہ سے ذہنی و جسمانی تشدد اور تضحیک کا نشانہ بن چکی ہیں، اس لیے اب وہ اس امید کے ساتھ نوجوان خواتین کو مشورہ دے رہی ہیں کہ ان کی باتوں سے وہ سیکھیں گی۔

یہ بھی پڑھیں: عتیقہ اوڈھو کا اپنی دوسری شادی سے متعلق دلچسپ انکشاف

ان کا کہنا تھا کہ جب بھی کوئی ساتھی یا شریک حیات کسی خاتون کی تضحیک کرتا ہے یا اس پر تشدد کرتا ہے تو خاتون کو اس کا رویہ برداشت نہیں کرنا چاہیے  کیونکہ اگر وہ ایسا کرتی رہیں گی تو انہیں یہ سب برداشت کرنے کی عادت ہوجائے گی اور وہ اپنا ذاتی تشخص بھی کھو دیں گی۔

عتیقہ اوڈھو نے لکھا کہ وہ سمجھتی ہیں کہ یہ ان کا فرض ہے کہ وہ نوجوان خواتین کو سمجھائیں کہ تشدد اور تضحیک آموز رویوں سے کس طرح بچنا ہے۔

یہ بھی پڑھیں: اداکارہ عتیقہ اوڈھو کا تیسری شادی سے متعلق اہم انکشاف

انہوں نے اپنی پوسٹ میں لکھا کہ ہر طرح کا تضحیک آموز رویہ اور تشدد ناقابلِ قبول ہے، چاہے ایسا کرنے والا شخص کوئی بھی ہو اور ایسا تجربہ کرنے والی خواتین کو ایسے مسائل سے نکل جانا چاہیے اور پھر انہیں واپس اس طرف مڑ کر دیکھنا بھی نہیں چاہیے۔

ان کا کہنا تھا کہ اگر کوئی بھی تشدد برداشت کرتا رہے گا تو ایک تو ایسا رویہ برداشت کرنے کی اس کی عادت بن جائے گی اور دوسرا ان پر تشدد کرنے والا مزید بدتر ہو کر ان کی تضحیک کرتا رہے گا، اس لیے ایسے تعلقات کو ختم کر کے آگے بڑھا جائے، خواتین اپنی زندگی کا اختیار کسی اور کو نہ دیں۔

انہوں نے نوجوان خواتین کو مشورہ دیا کہ وہ اپنی زندگی سے متعلق کسی کے فیصلوں کو تسلیم نہ کریں، وہ صرف اپنے دماغ اور دل کی باتیں سنیں اور ایسے فیصلے کر کے اپنا تشخص اور عزت بحال کریں، جس سے ان کی زندگی پرسکون گزرے۔

واضح رہے کہ عتیقہ اوڈھو نے 1980 میں کیریئر کا آغاز کیا تھا اور انہوں نے پہلی شادی طلاق پر ختم ہونے کے بعد ہی اداکاری شروع کی تھی۔