پاکستان کی معروف گلوکارہ آئمہ بیگ نے کہا ہے کہ حالیہ تنازع سے میرے والد کی صحت پر برے اثرات پڑے۔

معروف گلوکارہ نے والد کی سالگرہ پر ان کے لیے محبت بھرا پیغام جاری کرتے ہوئے انکشاف کیا کہ حال ہی میں سوشل میڈیا پر ان سے متعلق پیدا ہونے والے تنازع سے ان کے والد کی صحت پر برے اثرات پڑے۔

حال ہی میں آئمہ بیگ نے والد کی سالگرہ پر ان کی تصویر شیئر کرتے ہوئے لکھا کہ کہ والدہ کے انتقال کے بعد وہ والد کے قریب ہوئیں اور پایا کہ ان کے والد تو والدہ سے بھی زیادہ ان سے محبت کرتے ہیں۔

انہوں نے لکھا کہ جب وہ چھوٹی تھیں تو والدہ کے بہت قریب تھیں، کیونکہ ان کے والد ملازمت کی مصروفیات کی وجہ سے ان سے دور رہتے تھے لیکن جب وہ ان کے ساتھ زیادہ وقت گزارنے لگے تو انہیں معلوم ہوا کہ وہ تو والدہ سے بھی زیادہ ان سے محبت کرتے ہیں۔

ان کا کہنا تھا کہ مجھ سے متعلق سامنے آنے والے تنازع سے میرے والد کی ذہنی و جسمانی صحت پر برے اثرات پڑے، وہ پریشان ہوگئے کہ اب ان کی بیٹی کے ساتھ کیا ہوگا۔

معروف گلوکارہ نے کہا کہ جب ان کا تنازع سامنے آیا تو ان کے والد کی کوشش رہی کہ ان کی بیٹی کے لیے سب کچھ ٹھیک ہوجائے اور ان کی ننھی بچی آرام دہ ہو۔

انہوں نے کہا کہ میری وجہ سے میرے والد پریشان ہوگئے تھے اور وہ ان کے کمرے کے چکر لگاتے رہے اور دیکھتے رہے کہ ان کی بیٹی کس طرح ہیں۔

ان کا کہنا تھا کہ ان کے لیے ان کے والدین ہی سب سے بہترین چیز اور تحفہ رہے ہیں، حالیہ تنازع پر ان کے والد ان کے لیے ایسے پریشان ہوگئے جیسے ان کے بچپن میں وہ ان کے لیے پریشان ہوتے تھے۔