پاکستان کے معروف میزبان و اداکار فہد مصطفیٰ کا کہنا ہے کہ بھارتی اداکار گووندا کی وجہ سے اداکاری شروع کی۔

حال ہی میں اداکار فہد مصطفیٰ  نے دبئی میں ہونے والے ایوارڈز شو مڈل ایسٹ اچیورز نائٹ 2022 میں شرکت کی جہاں انہیں ایوارڈ سے نوازا گیا۔

   فہد مصطفیٰ اپنا ایوارڈ لینے کے لیے اسٹیج پر آئے تو انہوں نے کہا کہ میں نے گووندا کی وجہ سے اداکاری شروع کی، گوندا کا بہت بڑا فین ہوں اور انکی اداکاری کے انداز کو اپناتا ہوں۔

انہوں نے کہا کہ میں اپنے لیے باعث فخر سمجھتا ہوں کہ آج میں اس اسٹیج پر کھڑا ہوں جہاں کبھی گووندا تھے۔

 اس کے بعد اداکار فہد مصطفیٰ اسٹیج سے اتر کر سیدھے سامنے بیٹھے گووندا کے پاس گئے اور جھک کر ان سے ملے جس پر گووندا بھی کھڑے ہوگئے اور فہد کو گلے لگایا۔

اس کے بعد فہد مصطفیٰ رنویر سنگھ سے بھی ملے اور ان سے کچھ دیر گفتگو کی۔

فہد مصطفیٰ کی اداکاری باکمال اور گلوکاری بھی لاجواب

پاکستان شوبز انڈسٹری کے مشہور اداکار فہد مصطفیٰ اداکاری میں  تو باکمال ہیں ہی ہیں  لیکن ان کا گاناسن کر بھی مداح حیران ہوگئے۔

حال ہی میں سوشل میڈیا پر ایک ویڈیو وائرل ہوئی جس میں مشہور اداکار کو گانا گاتے ہوئے دیکھا جاسکتا ہے۔

فہد مصطفیٰ اور ماہرہ خان اپنی فلم کے پروموشن میں مصروف ہیں اور اسی دوران ایک نجی ٹی وی چینل پر انٹرویو کے دوران فہد مصطفیٰ نے گانا گایا۔

شیئر کی گئی ویڈیو میں دیکھا جاسکتا ہے کہ اداکار مشہور گانا ’بول ہلکے ہلکے‘ گا رہے ہیں اور ساتھ ہی شو میں بیٹھے سب تالیاں بجا رہے ہیں۔

ویڈیو سوشل میڈیا پر وائرل ہوتے ہی مداحوں کی جانب سے تعریفوں کا سلسلہ شروع ہوگیا،کسی نے ان کی آواز کی تعریف کی تو کسی نے ان کو ملٹی ٹیلنٹڈ قرار دیا۔

واضح رہے کہ فہد مصطفیٰ کی نئی فلم ’قائد اعظم زندہ باد‘ عید الضحیٰ پر ریلیز کی گئی جسے اب تک لاکھوں لوگ دیکھ چکے ہیں۔

اس کے علاوہ معروف اداکارنے ’لوڈ ویڈنگ‘، ’ایکٹر ان لاء‘ اور کئی فلموں میں اداکاری کے جوہر دکھائے۔