پاکستانی گلوکارہ عروج آفتاب کو ایک بار پھر گریمی ایوارڈز کے لیے نامزد کیا گیا ہے۔

حال ہی میں عروج آفتاب کو بھارتی گلوکارہ انوشکا شنکر کے ساتھ ان کے گانے ’اُدھیڑو نا‘ کے لیے گریمی ایوارڈ کی’بہترین گلوبل میوزک پرفارمنس‘ کی کیٹیگری میں دوسری بار نامزد کیا گیا ہے۔

عروج آفتاب کی جانب سے فوٹو اینڈ ویڈیو شیئرنگ ایپ انسٹاگرام پر اپنی گریمی ایوارڈز میں سال 2023ء کے لیے نامزدگی سے متعلق نیویارک ٹائمز میں شائع ہونے والی  خبر کا اسکرین شاٹ شیئر کیا گیا ہے۔

اسکرین شاٹ شیئر کرتے ہوئے اُنہوں نے گریمی ایوارڈز میں دوسری بار نامزدگی ملنے پر حیرت اور خوشی کا اظہار کرتے ہوئے لکھا کہ میں بہت جذباتی اور بہت خوش ہوں۔

ساتھ ہی گلوکارہ نے اپنے جذبات کا اظہار کرنے کے لیے ایک ویڈیو پیغام بھی شیئر کیا ہے۔

عروج آفتاب نے ویڈیو پیغام شیئر کرتے ہوئے لکھا کہ او میرے خدا! (اُدھیڑو نا) کو گریمی ایوارڈز میں نامزد کیا گیا ہے۔

گلوکارہ نے ہنستے ہوئے خود کو، انوشکا شنکر، مایو گلکرسٹ اور ندجے نوردھوئس کو یہ نامزدگی ملنے پر مبارکباد دی اور لکھا کہ میں ابھی جہاز کے اس ہال میں ہوں، ہم تقریباً 20 منٹ میں پرفارم کرنے والے ہیں اور میں نہیں جانتی کہ میں یہ کیسے کروں گی لیکن یہ بہت زبردست ہے۔

واضح رہے کہ عروج آفتاب پہلی پاکستانی گلوکارہ ہیں جنہوں نے گزشتہ سال اپنے مشہور گانے ’محبت‘ کے لیے بھی گریمی ایوارڈ جیتا تھا۔