بالی ووڈ فلم انڈسٹڑی کی مشہور و معروف اداکارہ روینہ ٹنڈن نے کہا ہے کہ سپر اسٹار اداکاروں کی نسبت خواتین سپر اسٹارز کو عمر کے طعنے دیئے جاتے ہیں۔

حال ہی میں اداکارہ روینہ ٹنڈن نے اپنے دیے گئے ایک انٹرویو میں کہا کہ سپر اسٹار اداکاروں کی نسبت خواتین سپر اسٹارز کو عمر کے طعنے دیئے جاتے ہیں، شوبز میں ایسی تفریق نہیں ہونی چاہیئے۔

انہوں نے کہا کہ جب عامر خان یا سلمان خان دو سال کے بریک کے بعد کوئی فلم کرتے ہیں تو کہا جاتا ہے کہ اداکار دو سال بعد دوبارہ اسکرین پر جلوہ گر ہوں گے لیکن جب مادھوری نئی فلم میں آئے تو کہا جاتا ہے کہ نوے کی دہائی کی مقبول اداکارہ ایک بار پھر فلم کے پردے میں دکھائی دیں گی۔

ان کا کہنا تھا کہ یہ دہرا معیار کیوں ہے؟ 90 کی دہائی کی اداکاراؤں کی طرح نوے کی دہائی کے ہیروز سنجے دت، عامر خان اور سلمان خان بھی اب تک کام کر رہے ہیں لیکن ان کو نوے کی دہائی کا اداکار سپر کیوں نہیں بولا اور لکھا جاتا؟

روینہ ٹنڈن نے کہا کہ کم از کم جو اداکارائیں نوے کی دہائی سے تاحال مسلسل کام کر رہی ہیں انھیں تو نوے کی دہائی کی سپر اسٹار نہ بولیں وہ اب بھی مقبول ہیں اور اگر بولنا ہے تو پھر سنجے دت، عامر خان اور سلمان خان کو بھی نوے کی دہائی کے اداکار بولیں۔

واضح رہے کہ بالی ووڈ فلم انڈسٹڑی کی مشہور و معروف اداکارہ روینہ ٹنڈن نے  1991 میں فلم پتھر کے پھول سے کیریئر کا آغاز کیا تھا۔