پاکستان شوبز انڈسٹری کی معروف فنکار جوڑی سنیتا مارشل اور حسن احمد کا حالیہ تنازعہ پر ردّعمل سامنے آگیا۔

اداکارہ نے اپنے آفیشل اکاؤنٹ انسٹاگرام پر شوہر کے ہمراہ تصویر شئیر کر کے صارفین کی جانب سے اپنے رشتے سے متعلق کی جانے والی قیاس آرائیوں پر پانی پھیر دیا۔

انہوں نے تصویر شیئر کرتے ہوئے کیپشن میں لکھا کہ ہم میں سب ٹھیک چل رہا ہے، آپ اپنا حال سنائیں؟

سنیتا مارشل کی اس پوسٹ پر اُن کے مداحوں سمیت شوبز کی مشہور شخصیات کی جانب سے بھی خوشی کا اظہار کیا جا رہا ہے۔

اس سے قبل ایک انٹرویو کے دوران سنیتا کا اپنے شوہر حسن احمد سے متعلق کہنا تھا کہ جب میں اپنے کیریئر کی بلندیوں پر تھی اُس وقت حسن احمد شوبز انڈسٹری میں جدوجہد کر رہے تھے ،اُنہیں کبھی کوئی کردار ملتا تھا کبھی نہیں۔

سنیتا نے بتایا کہ مجھے ایک بار انڈسٹری میں کام ملا تو ایک کے بعد ایک ملتا ہی چلا گیا مگر حسن کے ساتھ ایسا نہیں ہوا تھا، حسن کو شروع میں بہت مشکل پیش آئی تھی۔

سنیتا کے اس انٹرویو پر ردِ عمل دیتے ہوئے حسن احمد نے اپنے سوشل میڈیا اکاؤنٹ انسٹاگرام پر ایک ویڈیو شیئر کی تھی۔

حسن احمد کا کہنا تھا کہ سنیتا مارشل نے جو کچھ کہا وہ ان کا اپنا نظریہ ہے جو مجھ سے مختلف ہے، سنیتا کی کہی ہوئی کافی باتیں درست نہیں ہیں، اور اگر درست ہیں بھی تو وہ باتیں میاں بیوی کے درمیان ہی رہنی چاہئیے۔