بالی ووڈ فلم انڈسٹری کی مشہور و معروف اداکارہ ملائیکہ اروڑا نے اداکار ارجن کپور کو ڈیٹ کرنے سے متعلق تنقید کرنے والوں کو کرارا جواب دے دیا۔

حال ہی میں اپنے دیے گئے ایک انٹرویو میں اداکارہ ملائیکہ اروڑا کا کہنا تھا کہ لوگ مجھ پر ٹرول کرتے ہیں کہ میں اپنے سے چھوٹے لڑکے سے تعلقات میں ہوں، لوگ کہتے ہیں میں اس کی زندگی خراب کر رہی ہوں لیکن ایسا کچھ نہیں ہے۔

انہوں نے کہا کہ ارجن کوئی اسکول جاتا بچہ نہیں ہے جو میری وجہ سے اپنی پڑھائی پر توجہ نہیں دے پارہا اور میں نے اسے کہا ہے کہ آجاؤ میرے ساتھ، یا وہ میرے لیے اپنی کلاسز چھوڑ رہا ہو، میں نے اسے کسی گلی سے کھیلتے ہوئے نہیں پکڑا۔

ان کا کہنا تھا کہ وہ ایک بالغ مرد ہے، اگر مرد خود سے چھوٹی عمر کی لڑکی کو ڈیٹ کرے تو لوگوں کو مسائل ہیں جب کہ کوئی عورت کسی کم عمر لڑکے سے تعلقات قائم کرے تو اسے غلط کہا جاتا ہے، یہ ناانصافی ہے۔