ماضی کی مقبول شوبز جوڑی سائرہ یوسف اور شہروز سبزواری کی رومانٹک فلم ’بے بی لیشس‘کا ٹیزر جاری کردیا گیا ہے۔

سائرہ یوسف اور شہروز سبزواری اپنی طلاق کے دو سال بعد رومانوی فلم ’بے بی لیشس‘میں ایک ساتھ کام کرتے دکھائی دیں گے۔

سائرہ یوسف اور شہروز سبزواری اگرچہ ماضی میں بھی ایک ساتھ اسکرین پر کام کر چکے ہیں لیکن طلاق کے بعد دونوں پہلی مرتبہ ایک ساتھ اسکرین پر نظر آنے والے ہیں جس کا ٹیزر شہروز سبزواری نے شیئرکیا۔

یہ فلم کوکونٹ پروڈکشن اور ٹینپ کی مشترکہ پیشکش ہے۔

گزشتہ ہفتے سائرہ یوسف اور شہروز سبزواری نے اپنی فلم ’بے بی لیشس‘کی پہلی جھلک جاری کی تھی۔

پوسٹر شیئر کرتے ہوئے سائرہ یوسف نے کیپشن میں لکھا تھا کہ فروری 2023 میں ہمیں اس فلم بے بی لیشئیس سے منسلک ہوئے 12 سال ہو جائیں گے، آپ سب کے لیے یہ بتاتے ہوئے بہت پرجوش ہوں! ہم اپنی نئی فلم کی پہلی جھلک پیش کر رہے ہیں۔

اس فلم کا پوسٹر دیکھ کر بہت سے لوگوں کو دکھ ہونے لگا کہ سائرہ اور شہروز کچھ سال پہلے تک میاں بیوی تھے اور اب وہ ایک فلم میں آن اسکرین جوڑے کے روپ میں نظر آئیں گے۔

یاد رہے کہ سائرہ یوسف اور شہروز سبزواری کی جوڑی کا شمار رومانوی جوڑیوں میں ہوتا تھا، انہوں نے 2012 میں اداکار شہروز سبزواری سے شادی کی تھی۔

تاہم ان کے شوہر کے ماڈل صدف کنول سے تعلقات کے بعد مارچ 2020 میں ان کی طلاق ہوگئی۔

سائرہ یوسف کو پہلے شوہر سے ایک بیٹی بھی ہے،جو ان کے ساتھ رہتی ہیں۔