ٹام کروز ایسے اداکار ہیں جو اپنی فلم کی کامیابی کے لیے زندگی کو داؤ پر لگانے بھی سے گریز نہیں کرتے۔

اب فلمی دنیا کے اس مقبول اسٹنٹ مین نے موٹرسائیکل سے پہاڑی کے کنارے سے نیچے چھلانگ لگا کر بیس جمپ کا مظاہرہ کیا ہے۔

2023 میں ریلیز ہونے والی فلم مشن امپاسبل 7 کے لیے ٹام کروز نے ایسا کیا۔

اداکار نے ٹوئٹر پر ایک ویڈیو جاری کرتے ہوئے اسے اپنی زندگی کا سب سے خطرناک اسٹنٹ قرار دیا۔

اس اسٹنٹ کے لیے ٹام کروز نے 500 سے زیادہ بار اسکائی ڈائیوز جبکہ 13 ہزار بار موٹرسائیکل جمپ کی مشق کی اور یہ سلسلہ کئی ماہ تک جاری رہا۔

اس اسٹنٹ کو 2020 میں ناروے میں فلمایا گیا تھا اور اب اس کی ویڈیو جاری کی گئی ہے۔

فلم کے ڈائریکٹر کرسٹوفر میکوائر کے مطابق ٹام کروز نے ماہرین کے ساتھ مشاورت کرکے موٹرسائیکل اور بیس جمپنگ کا ‘ماسٹر پلان’ تیار کیا۔

یہ بھی پڑھیں: ٹام کروز کی خطرناک اسٹنٹ کرتے ویڈیو وائرل

فلم کے بیس جمپنگ کوچ مائلز ڈیشر نے بتایا کہ اس طرح کے اسٹنٹس میں سنگین طور پر زخمی ہونے یا موت کا خطرہ بھی ہوتا ہے۔

So excited to share what we’ve been working on. #MissionImpossible pic.twitter.com/rIyiLzQdMG

Advertisement

— Tom Cruise (@TomCruise) December 19, 2022

ماضی میں ایک انٹرویو کے دوران ٹام کروز نے اس اسٹنٹ کے بارے میں بتایا تھا کہ انہوں نے ایسا اسٹنٹ زندگی بھر نہیں کیا، ذرا سی غلطی بھاری پڑ سکتی تھی۔

خیال رہے کہ مشن امپاسبل 7 کو ڈیڈ ریکنگ پارٹ 1 کا نام دیا گیا ہے جو 14 جولائی 2023 کو ریلیز ہوگی جبکہ اس کا دوسرا حصہ 28 جون 2024 کو ریلیز کیا جائے گا۔

دونوں فلموں کی ہدایات کرسٹوفر میکوائر دیں گے۔

مشن امپاسبل 7 میں ٹام کروز کے ساتھ ان کی ٹیم میں شامل ربیکا فرگوسن، سائمن پیگ اور وائنگ رحمس کی بھی واپسی ہوگی جبکہ چند نئے کرداروں کو بھی متعارف کرایا جائے گا۔