پاکستان کے معروف اداکار ببرک شاہ نے 4 سالہ بیٹے کی موت کی اصل وجہ بتادی ہے۔

4 دسمبر کو اداکار نے اپنے فیس بک اکاؤنٹ پر اپنے بیٹے کی تصویر پوسٹ کی تھی جس کے کیپشن میں لکھا تھا کہ ان کا بیٹا اس دنیا میں نہیں رہا، ساتھ ہی انہوں نے مداحوں سے دعاؤں کی اپیل بھی کی تھی۔

بعدازاں کچھ میڈیا رپورٹس نے دعویٰ کیا تھا کہ اداکار ببرک شاہ کے بیٹے کی موت گھر میں پانی کے ٹینک میں ڈوب کر ہوئی لیکن اداکار نے اب ان تمام خبروں کی تردید کر دی ہے۔

حال ہی میں اداکار نے نجی ٹی وی چینل کو انٹرویو دیتے ہوئے کہا کہ’پانی کے ٹینک سے بچے کی موت کا کوئی لینا دینا نہیں ہے، میرے پورے گھر میں کوئی ٹینک موجود نہیں ہے، یہ خبر ایک شخص نے پھیلائی میں اس کا نام نہیں لینا چاہتا، اس نے اپنے فیس بک پر لگایا اور مجھے میرے خاندان نے اس کا اسکرین شاٹ بھیجا’۔

انہوں نے کہا کہ میں وہ اسکرین شاٹ دیکھ کر حیران رہ گیا تھا،  میری اس شخص کے لیے دعا ہے کہ اسے اپنی زندگی میں دو بیٹوں کو دفنانے کا موقع ملے۔

ببرک شاہ نے کہا کہ ہماری سوسائٹی میں تو پانی ہی مرکزی ٹینک سے آتا ہے اور وہ کم سے کم 50 فٹ اونچا ہے، میں اپنے گھر کے ڈرائنگ روم میں بیٹھا آفس کا کام کررہا تھا کہ بیٹا آیا اور اس نے مجھے کچھ کہا جس پر میں نے اسے ماں کے پاس بھیج دیا۔

انہوں نے کہا کہ یہ ڈرائنگ روم سے نکل کر گھر سے باہر نکل گیا، ہمارے گھر کے نزدیک ایک نرسری ہے وہاں ایک تالاب ہے جس میں مچھلیاں ہوتی ہیں، بچے وہاں مچھلیاں دیکھنے جایا کرتے تھے لیکن ان کے ساتھ کوئی بڑا لازمی ہوتا تھا۔

    اداکار نے کہا کہ بیٹا اس دن اکیلے ہی وہاں نکل گیا، زاویار وہاں نہیں جاتا تھا لیکن پتا نہیں اس دن کیسے چلا گیا، وہ تالاب خطرناک تھا، اسی میں ڈوب کر اس کی جان چلی گئی۔

ببرک شاہ نے کہا کہ تالاب کی گہرائی کافی زیادہ تقریباً 9 فٹ  تھی جس کے باعث بیٹے کی موت ہوگئی، تھوڑی دیر بعد جب بیٹا ہمیں دکھائی نہیں دیا تو ہم نے اس کی تلاش شروع کردی، گھر اور باہر ہر جگہ ڈھونڈا، میں اندر گیا تو باہر سے چیخوں کی آواز آئی، باہر آکر دیکھا تو ایک بندہ بیٹے کو سی پی آر دینے کی کوشش کررہا تھا۔

انہوں نے کہا کہ انہیں لگا اسے ابھی ابھی پانی سے نکالا گیا ہے، انہوں نے بیٹے کے منہ سے پانی نکالنے کی کوشش کی لیکن بیٹا بے سدھ پڑا رہا، میں اسپتال لے کر بھاگا لیکن بچہ انتقال کر چکا تھا۔