پاکستان کی نامور میزبان و اداکارہ ندا یاسر کو وائرل ڈانس گرل عائشہ کو اپنے شو میں بلانا مہنگا پڑگیا ہے۔

میزبان ندا یاسر نے چند روز قبل “میرا دل یہ پکارے آجا” گانے پر ڈانس سے وائرل ہونے والی لڑکی عائشہ کو اپنے مارننگ شو میں مدعو کیا تھا جس کی وجہ سے اُن کو سوشل میڈیا پر کڑی تنقید کا نشانہ بنایا جا رہا ہے۔

ہزاروں پاکستانیوں کی جانب سے ندا یاسر پر اپنے شو کے ذریعے فحاشی پھیلانے کا الزام لگایا جا رہا ہے۔

سوشل میڈیا صارفین کا کہنا ہے کہ “ندا یاسر اپنے مارننگ شو میں صرف اسی قسم کی فضول چیزوں کو کیوں پروموٹ کرتی ہیں”؟

ایک صارف نے سماجی رابطے کی ویب سائٹ ٹوئٹر پر ایک ٹویٹ کرتے ہوئے “شکوہ کیا کہ ندا نے کبھی اپنے شو میں سائنسدانوں اور یونیورسٹی کے گولڈ میڈلسٹ کو نہیں بلایا”۔

جبکہ ایک اور صارف نے لکھا کہ “پاکستان کے بچے کبھی تعلیم کی طرف متوجہ نہیں ہوں گے،  جب میڈیا پر فخریہ انداز میں پڑھے لکھے لوگوں کے بجائے ناچنے والوں کو دکھایا جائے گا، پھر ہر کوئی بے حیائی اور بے شرمی کی طرف ہی جائے گا، شرم آنی چاہیے”۔

واضح رہے کہ مہندی رنگ کا لباس زیبِ تن کیئے دھیما دھیما رقص کرنے والی اس نوجوان لڑکی کا نام ”عائشہ “ ہے۔

عائشہ کی جانب سے اپنی سہیلی کی مہندی کی تقریب میں کیا گیا رقص اس وقت سوشل میڈیا صارفین کی توجہ کا مرکز بنا ہوا ہے اور بہت سے لوگ اس گانے پر رقص کرنے کی ویڈیوز بنا رہے ہیں۔

کلپ اب تک 3 ملین سے زائد بار دیکھا جا چکا ہے جو اب تک سوشل میڈیا پر ٹرینڈ کر رہا ہے۔