پاکستانی کرکٹر شعیب ملک نے ثانیہ مرزا سے علیحدگی کی افواہوں سے متعلق سوال کا جواب دیدیا ہے۔

حال ہی میں ایک انٹرویو کے دوران میزبان نے پاکستانی کرکٹر شعیب ملک سے سوال کیا کہ آپ اور ثانیہ مرزا میں علیحدگی سے متعلق بہت سی افواہیں زیرِ گردش ہیں، اس کا مختصر سا صرف ہاں یا ناں میں جواب دے دیں۔

 اس کے جواب میں انہوں نے کہا کہ یہ ہمارا نجی معاملہ ہے، اس سے متعلق میں اور نہ میری اہلیہ جواب دے رہے ہیں، اس کے لیے معذرت، اس لیے میں چاہتا ہوں کہ علیحدگی سے متعلق سوالوں کو آپ ہم سے دور ہی رکھیں، اس سوال کو چھوڑ ہی دیں۔

  انہوں نے کہا کہ آنے والے وقت میں اگر ٹی وی سے اداکاری کی کوئی آفر آتی ہے تو میں ناں نہیں کروں گا، دیکھیں آگے کیا ہوتا ہے آنے والی زندگی میں، میں ہر چیز کے لیے تیار ہوں۔

 شعیب ملک نے کہا کہ کرکٹ مصروفیات کی وجہ سے فیملی کے لیے وقت نہیں ملتا تھا اور اب بیٹے اذہان نے بھی اسکول جانا شروع کر دیا ہے جس کے بعد میں نے فیملی سے بات کی اور فیصلہ کیا کہ کرکٹ کم کھیلی جائے، پہلے میں ہر لیگ کھیلتا تھا جو اب میں نے کم کر دی ہے لیکن اب بھی کرکٹ پریکٹس اور فٹنس پر توجہ بھرپور ہے۔

ایک سوال کے جواب میں شعیب ملک کا کہنا تھا کہ کپتان بابر اعظم کو چھوٹا بھائی سمجھتا ہوں، بابر نے مجھے ایشیا کپ کے دوران ہی کہہ دیا تھا کہ ورلڈ کپ میں یہی ٹیم جائے گی۔

انہوں نے کہا کہ بابر کو جب بھی میری ضرورت پڑی ہمیشہ سے ہوں اور ہمیشہ اس کے پاس رہوں گا، اگر میں کسی وجہ سے ٹیم میں نہیں ہوا تو ایسا ہر گز نہیں ہے کہ میں بابر سے منہ بنا لوں یا ناراض ہو جاؤں، میری دعائیں ہمیشہ بابر کے ساتھ ہیں اور میں ہمیشہ سے چاہتا ہوں بابر ترقی کرے اور ہمیشہ وہ سرفہرست رہے، مجھے بابر سے کوئی گلہ نہیں۔

 شعیب ملک کا کہنا تھا کہ جو لوگ یہ سوچتے ہیں میری سلیکشن سے متعلق ٹوئٹ کی وجہ سے قومی ٹیم میں سلیکشن نہیں ہو سکی وہ غلط سوچتے ہیں، میں نے وہ ٹوئٹ اس لیے کی جو میں نے دیکھا اس میں بہتری آسکے، میں ہرگز دل برداشتہ نہیں ہوں۔

میزبان نے کرکٹ سے ریٹائرمنٹ سے متعلق سوال کیا جس کے جواب میں شعیب ملک کا کہنا تھا کہ کرکٹ سے ریٹائر ہونے کا بالکل بھی ارادہ نہیں جب بھی ایسا سوچوں گا سب کو پتہ چل جائے گا، ابھی سارا فوکس کرکٹ پر ہے لیکن لیگ کرکٹ کو کم کردیا ہے۔