پاکستان کے معروف اداکار احسن خان بھی گلوکار کیفی خلیل کے مداح نکلے۔

حال ہی میں اداکار نے فوٹوز اینڈ ویڈیوز شیئرنگ ایپ انسٹا گرام پر کیفی خلیل کے ساتھ ایک ویڈیو شئیر کی ہے، جس میں گلوکار اپنا گانا کہانی سنو ان کو براہ راست سنا رہے ہیں۔

ویڈیو شئیر کرتے ہوئے، انہوں نے کیپشن میں لکھا کہ کیفی خلیل کی بہت ہی حیرت انگیز آواز ہے، ان میں سپر ٹیلنٹ ہے۔

احسن خان نے کیفی خلیل کی تعریف کرتے ہوئے لکھا کہ کام کو مزید جاری رکھیں۔

اس ویڈیو کو سوشل میڈیا صارفین کی جانب سے خوب پسند کیا جا رہا ہے اور تعریفوں کا سلسلہ بھی جاری ہے۔

اس سے قبل اپنے دیے گئے ایک انٹرویو میں گلوکار کیفی خلیل کا کہنا تھا کہ لیاری کے بارے میں لوگوں کا تاثر غلط رہا ہے اور اسے غلط سمجھا گیا ہے۔

انہوں نے کہا کہ یہ ایک ایسی جگہ ہے جہاں فن اور کھیلوں کو پسند کیا جاتا ہے اور ان کی حوصلہ افزائی بھی کی جاتی ہے۔

ان کا کہنا تھا کہ بطورِ گلوکار لیاری کے لوگ مجھے بہت عزت دیتے ہیں انہیں یہ اچھا لگتا ہے کہ میں گلوکار ہوں اور اُن کے علاقے سے تعلق رکھتا ہوں۔

کیفی خلیل نے کہا کہ لیاری ایسی جگہ نہیں ہے جو خطرناک ہو، جگہ نہیں بلکہ لوگ خطرناک ہوتے ہیں اور وہ لوگ ہر جگہ پائے جا سکتے ہیں۔

یاد رہے کہ کیفی خلیل نے ابتدائی طور پر ’کہانی سنو‘ کو جون 2021 میں ریلیز کیا تھا، جس کے بعد انہوں نے اب اسی گانے کو نئے انداز میں 2022 میں ریلیز کیا ہے۔

اس سے قبل کیفی خلیل نے کوک اسٹوڈیو سیزن 14 کے بلوچی زبان کے مقبول ترین گانے ’کنا یاری‘ کے بول لکھے اور گائے تھے۔