پاکستان شوبز انڈسٹری کی مشہور و معروف اداکارہ مایا علی نے عمرے کی سعادت حاصل کرلی ہے۔

حال ہی میں اداکارہ مایا علی نے سوشل میڈیا کی فوٹو اینڈ ویڈیو شئیرنگ ایپ انسٹا گرام پر کچھ تصاویر اور ویڈیوز پوسٹ کیں جس میں انہوں نے مداحوں کو یہ خبر دی کہ انہوں نے عمرے کی سعادت حاصل کرلی ہے۔

انہوں نے شیئر کی گئی تصاویر اور ویڈیوز کے کیپشن میں لکھا کہ “بے شک وہ جب چاہے اور جسے چاہے بلائے”۔

اداکارہ نے لکھا کہ “میں نے واقعی اپنے آپ کو ظاہر کرنے کی بہت کوشش کی  لیکن ہر بار الفاظ کم پڑ گئے جو میرے حقیقی اور اندرونی احساسات کو بیان کر سکیں”۔

انہوں نے یہ بھی لکھا کہ “ہر چیز کے لئے اللہ کا شکر ہے”۔

اداکارہ کی پوسٹ پر شوبز انڈسٹری کے کئی فنکاروں اور مداحوں کی جانب سے نیک تمناؤں کے اظہار کا سلسلہ جاری ہے۔

واضح رہے کہ اداکارہ مایا علی کا اصل نام مریم تنویر علی ہے جو ڈرامہ اور فلموں میں ادا کیے گئے اپنے کرداروں کے لیے مشہور ہیں۔

پاکستان شوبز انڈسٹری کی صفِ اول کی اداکارہ مایا علی کا شمار ان شوبز اداکاراؤں میں ہوتا ہے جنہوں نے کئی فلموں، ڈراموں اور اشتہاروں میں اپنی اداکاری کے جوہر دکھائے ہیں۔

مایا علی انسٹاگرام پر بھی کافی ایکٹو رہتی ہیں اور اپنی تصاویر اور ویڈیوز مداحوں کے ساتھ شیئر کرتی نظر آتی ہیں۔