بالی ووڈ اداکار کارتک آریان کو اداکار شاہ رخ خان سے موازنہ کرنا مہنگا پڑگیا۔

 میڈیا رپورٹس کے مطابق کارتک آریان نے “فریڈی” میں اپنے کردار کا موازنہ شاہ رخ کی فلم “ڈر”  سے کیا۔

انہوں نے ایک انٹرویو کے دوران فلم کی کامیابی پر بات کرتے ہوئے کہا  کہ ان کی فلم کا موازنہ شاہ رخ خان کی 1993 کی فلم ڈر سے کیا جا رہا ہے۔

اداکار کا کہنا تھا کہ مجھے خوشی ہے مداحوں نے میرے کردار کو پسند کیا اور تعریف کی، مگر میں شاہ رخ خان جیسا کردار ادا نہیں کر پایا، وہ لیجنڈ ہیں۔

شاہ رخ خان کے مداحوں کو کارتک آریان کے یہ الفاظ پسند نہیں آئے اور انہوں نے اداکار پر تنقید شروع کر دی۔

 ایک صارف نے لکھا کہ مجھے بھی اپنی زندگی میں اسی طرح کے جعلی اعتماد کی ضرورت ہے جبکہ ایک اور صارف نے لکھا کہ کوئی شک نہیں کارتک  نے “فریڈی” میں شاندار ادا کاری کی مگر اس کا ڈر سے موازنہ کرنا، زیادتی ہے  کیونکہ شاہ رخ خان کی ڈر میں اداکاری دیکھنے کے قابل تھی۔

اس سے قبل کارتک آریان نے بالی ووڈ میں اپنی پہچان کے حوالے سے اہم انکشاف کیا تھا۔

اداکار کارتیک نے بتایا کہ بالی ووڈ ڈیبیو کے بعد بھی لوگ کئی سالوں تک ان کے نام سے ناواقف تھے۔

کارتک آریان نے اپنے ایک انٹرویو میں اپنے بالی ووڈ کیرئیر کے آغاز کے بارے میں بات کرتے ہوئے کہا کہ لوگ میرے فلمی کیریئر کی پہلی فلم  ’فلم پیار کا پنچ نامہ‘ کے بعد بھی تقریباً 6 سے7 سال تک نہ مجھے جانتے تھے اور نہ ہی میرے نام سے واقف تھے۔

اُنہوں نے کہا کہ ایسے وقت بھی آئے جب مجھے اپنے کام کے مناسب نتائج نہیں ملے، یہاں تک کے جب میرے کیرئیر کی پہلی فلم ہٹ ہوئی تب بھی لوگ مجھے پہچان نہیں سکے۔

کارتک آریان نے مزید کہا کہ میں ابھی بھی ہدایت کاروں کی فہرست میں نمایاں اداکار نہیں ہوں کہ وہ میرے بارے میں ترجیحی بنیاد پر یہ بات کہیں کہ وہ اپنی فلم میں میرے ساتھ کام کرنا چاہتے ہیں۔

کارتک آریان نے اپنی بات مکمل کرتے ہوئے کہا کہ مجھے اپنے کیریئر میں ایسے بہت سے لمحات دیکھنے کو ملے لیکن مجھے لگتا ہے کہ میں نے ان لمحات اور اوقات سے بہت کچھ سیکھا ہے اور اب بہت سی مشکلات حل ہوچکی ہیں۔