پاکستانی بلاک بسٹر فلم’ دی لیجنڈ آف مولا جٹ ‘ دنیا بھر میں ریکارڈ بزنس کرنے کے بعد اب بھارت میں بھی ریلیز کیلئے تیار ہے۔

بالآخر طویل انتظار کے بعد  تاریخ کا اعلان بھی کر دیا گیا، پاکستانی سینما میں تاریخ رقم کرنے والی فلم ”دی لیجنڈ آف مولا جٹ“ 30 دسمبر ( کل) کو بھارتی پنجاب کے سینما گھروں کی زینت بنے گی۔

بھارت کی سب سے بڑی سینما چین پی وی آر کی جانب سے فلم کی ریلیز سے قبل تشہیری مہم کا آغاز کردیا گیا ہے۔

میڈیا رپورٹس کے مطابق  بھارتی مشرقی پنجاب میں بھی فلم کا ٹریلر سینما گھروں میں چل رہا ہے جس کے مطابق فلم 30 دسمبر کو ریلیز کی جائے گی۔

صرف یہی نہیں بلکہ اس فلم کو  بھارتی پنجاب اور دہلی کے منتخب سینما گھروں میں ریلیز کیا جائے گا، اس بات کی تصدیق آئی این او ایکس لیزر کے چیف پروگرامنگ آفیسر راجندر سنگھ جیالا نے کی، جو ایک ہندوستانی ملٹی پلیکس چین ہے۔

مولاجٹ کا ٹریلر دیکھیں:

یہ بھی پڑھیں: کرن جوہر بھی مولا جٹ دیکھے بنا نہ رہ سکے؛ فلم دیکھنے سنیما پہنچ گئے

رواں سال اکتوبر میں دنیا بھر میں ریلیز ہونے والی فلم ’دی لیجنڈ آف مولا جٹ ‘ اب تک کی سب سے زیادہ کمائی کرنے والی پاکستانی فلم بن گئی ہے اور اب تک باکس آفس پر 10 ملین ڈالر سے زیادہ کا بزنس کر چکی ہے۔

واضح رہے کہ عالمی شہرت یافتہ اداکار فواد خان، ماہرہ خان، حمزہ علی عباسی اور حمیمہ ملک کی مرکزی کاسٹ پر مبنی ایکشن فلم ’دی لیجنڈ آف مولا جٹ‘ پنجابی زبان کی فلم ہے جو کہ 1979 میں ”مولا جٹ“ کے نام سے بنائی گئی فلم کا نیا ورژن ہے۔

یہ بھی پڑھیں: دی لیجنڈ آف مولا جٹ کے بعد سن آف مولا جٹ کی تیاری شروع