پاکستان کی معروف شوبز شخصیات کی جانب سے سانحہ آرمی پبلک اسکول کی آٹھویں برسی کے موقع پر پیغام جاری کیے گئے ہیں۔

شوبز انڈسٹری کی معروف اداکارہ ماورہ حسین نے اپنے انسٹاگرام اکاؤنٹ پر ایک تصویر پوسٹ کی ہے جس میں آرمی پبلک اسکول کے بچوں کے یونیفارم کو دیکھا جاسکتا ہے۔

تصویر کے کیپشن میں اداکارہ نے لکھا ہے کہ اے پی ایس کے شہداء کو یاد کرتے ہوئے میری دعائیں ان تمام بچوں کے ساتھ ہیں جو شہید ہو گئے اور جو بچ گئے ہیں، جنہوں نے صدمے کے باوجود جینے کا انتخاب کیا۔

دوسری جانب شوبز انڈسٹری کی معروف اداکارہ منال خان نے اپنے انسٹاگرام اکاؤنٹ پر ایک تصویر پوسٹ کی ہے جس میں آرمی پبلک اسکول کے بچوں کے یونیفارم کو دیکھا جاسکتا ہے۔

تصویر کے کیپشن میں اداکارہ نے لکھا ہے کہ ہم اس سانحے کو کبھی نہیں بھولیں گے۔

اس کے علاوہ معروف اداکار فیصل قریشی نے اپنے انسٹاگرام اکاؤنٹ کی اسٹوری پر ایک پوسٹ شیئر کی ہے جس میں آرمی پبلک اسکول کے بچوں کے یونیفارم کو دیکھا جاسکتا ہے۔

سانحہ آرمی پبلک اسکول پشاور کو 8 سال بیت گئے

سانحہ آرمی پبلک اسکول پشاور کو 8 سال بیت گئے مگر اپنے خون سے علم کے دیے جلانے والے دلوں میں وہ سارے معصوم شہید آج بھی زندہ ہیں۔

2014 میں آج ہی کے دن چھ دہشت گردوں نے آرمی پبلک اسکول پشاور پر حملہ کر کے اسکول کے ایک سو سینتالیس معصوم طلباء اور اساتذہ کو شہید کر دیا تھا۔

یہ بھی پڑھیں: سانحہ اے پی ایس میں اپنے بھائی کو کھونے والے 3 طلباء کی پُرعزم داستان

 اس سانحے پر قوم کے زخم آج بھی تازہ ہیں، شہداء کے لواحقین آج بھی غم سے نڈھال ہیں، مگر حوصلے جوان ہیں۔

پس منظر:

سانحہ اے پی ایس کا دلخراش واقعہ 16 دسمبر 2014 کو پیش آیا جب صبح طلباء علم کے حصول کے لیے گھر سے اسکول گئے تھے، وہ ابھی اسکول میں علم کی شمع سے روشناس ہورہے تھے کہ 10 بجے کے درمیان 7 دہشت گرد اسکول کے اندر داخل ہوئے اور معصوم طلباء سمیت پرنسپل اور دیگر افراد کو بے رحمی سے شہید کیا۔

یہ وہ دن تھا جس کا سورج حسین تمناؤں اور دلفریب ارمانوں کے سنگ طلوع ہوا مگر غروب 132 معصوم و بے قصور بچوں کے لہو کے ساتھ ہوا تاہم یہ وہ سانحہ تھا جس نے ہر محب وطن پاکستانی کو دلگیر و اشکبار کیا۔

مزید پڑھیں: اے پی ایس حملے میں بچ جانے والے احمد نواز آکسفورڈ یونین کے صدر بن گئے

16 دسمبر 2014 کو  اے پی ایس پشاور لہو لہو ہوا تو ملت پاکستان نے بھی رب ذوالجلال کو گواہ بنا کر یہ عہد کر لیا کہ جب تک عرض پاک سے آخری دہشت گرد کا خاتمہ نہ ہو جائے حق و باطل اور بقا و فنا کی یہ جنگ جاری رہے گی۔