سابقہ گلوکارہ رابی پیرزادہ نے لڑکیوں کی ڈانس ویڈیوز وائرل کرنے اور مردوں کے عورتوں کی نقل کرنے پر ردِ عمل دیا ہے۔

حال ہی میں رابی پیرزادہ نے نجی ٹی وی کے ایک شو میں بطور مہمان شرکت کی۔

شو کے دوران رابی پیرزادہ نے آج کل سوشل میڈیا پر ڈانس کرتی خواتین کی ویڈیوز کو وائرل کرنے اور مردوں کی جانب سے عورتوں کا روپ اپنانے پر کھل کر بات کی۔

انہوں نے کہا کہ ہم بحیثیت معاشرہ تنزلی کی طرف گامزن ہیں کیونکہ ہم ایسے مردوں کو آئیڈیل بنا رہے ہیں جو خواتین کی نقل کرتے ہیں اور دوسری جانب خواتین رقص کرکے مشہور ہو رہی ہیں۔

سابقہ گلوکارہ کا کہنا تھا کہ یہ چیزیں ہمیں نہیں کرنی چاہئیں، ہم خود اپنا معاشرہ خراب کر رہے ہیں، ہم خود لوگوں کو وائرل کر دیتے ہیں۔

رابی پیرزادہ نے کہا کہ ہم خود اپنے معاشرے کو آنے والی نسل کے لیے زہریلا کر رہے ہیں، ہماری آئیڈیل رقص کرنے والی خواتین ہیں ۔

یاد رہے کہ ماضی میں مختلف تنازعات سے گزر کر شوبز کو خیر باد کہنے والی سابقہ گلوکارہ رابی پیرزادہ اب ایک فلاحی ادارہ چلا رہی ہیں۔