پاکستان کی معروف اداکارہ نادیہ خان کا کہنا ہے کہ معاشرے میں طلاق کی بڑھتی ہوئی شرح کی وجہ بے راہ روی کا بڑھنا، مرد و خواتین کو ملنے والی آزادیاں اور ناجائز تعلقات ہیں۔

حال ہی میں اداکارہ و میزبان نادیہ خان سے ایک انٹرویو میں معاشرے میں طلاقوں کے بڑھتے رجحانات سے متعلق پوچھا گیا جس پر ان کا کہنا تھا کہ طلاقوں کے کئی اسباب ہیں۔

انہوں نے کہا کہ ’ماضی میں لڑکے اور لڑکی کے درمیان رابطہ ہونا اور تعلق بننا بہت مشکل ہوتا تھا، کبھی کبھی کوئی لڑکا ہمت کرکے کسی لڑکی کے سامنے کارڈ پھینک کر بھاگ جاتا تھا مگر اب صورتحال مختلف ہے ‘۔

نادیہ خان نے کہا کہ ’سب سے سادہ اور آسان جواب یہ ہے کہ اب لوگ ایک دوسرے کے ساتھ سچے اور وفادار نہیں رہے اور خصوصی طور پر مرد بے راہ روی کا شکار ہیں ‘۔

یہ بھی پڑھیں؛ ندا یاسر نے نادیہ خان کا مارننگ شو کی پہلی میزبان ہونے کا دعویٰ مسترد کردیا

اداکارہ کا کہنا تھا کہ ’اب آسانیاں پیدا ہو گئی ہیں اور مرد حضرات کو ہر طرف لڑکیاں ہی لڑکیاں دکھائی دیتی ہیں، جس وجہ سے اب انہیں گھر کو سنبھالنے اور بچوں کی پرورش کرنے والی بیوی اچھی نہیں لگتی ‘۔

انہوں نے کہا کہ ’اب مرد حضرات کے لیے غلط خواہشوں کی تکمیل کو مکمل کرنا آسان بن چکا ہے، کیوں کہ اب ان کے پاس آپشن بہت ہیں، ان کے پاس گھر ہیں، اپارٹمنٹس ہیں، ڈیٹنگ پوائنٹس اور ایپس بھی ہیں ‘۔

اداکارہ و میزبان نے کہا کہ ’ان کی کچھ جاننے والی دوست لڑکیوں کے شادی شدہ مرد حضرات کے ساتھ تعلقات ہیں اور انہیں ایسے مرد حضرات پر بہت غصہ آتا ہے، کیوں کہ وہ دونوں طرف جھوٹ بول رہے ہوتے ہیں، چکر چلا رہے ہوتے ہیں، شادیاں کر رہے ہوتے ہیں ‘۔

نادیہ خان نے کہا کہ ’انہیں ایسی لڑکیوں پر بھی غصہ آتا ہے جو شادی شدہ مرد حضرات کے ساتھ لگی ہوئی ہوتی ہیں، بہت ساری لڑکیاں ایسی ہوتی ہیں جو ہمیشہ پیسے والے شخص کی تلاش میں رہتی ہیں اور ان کی خواہش ہوتی ہے کہ انہیں کوئی پیسے والا آدمی مل جائے، جو ان کے نام گھر کر دے اور انہیں تین چار کروڑ روپے بھی دے ‘۔

 اداکارہ و میزبان کا کہنا تھا کہ ’اب جہاں مرد حضرات سے سچائی ختم ہوچکی ہے، وہیں ان کی ہوس کی خواہشیں بڑھ چکی ہیں، انہیں مزے کرنے ہوتے ہیں اور ساتھ ہی اب ایسے مواقع بھی زیادہ ہو چکے ہیں اور ان سب باتوں کی وجہ سے طلاقیں عام ہو چکی ہیں ‘۔

انہوں نے کہا کہ ’اب مرد حضرات کے لیے شادیاں کرنا، گرل فرینڈز رکھنا آسان بن چکا ہے اور جب معاشرہ آسانیاں دینے لگے تو مسائل ضرور پیدا ہوں گے ‘۔

نادیہ خان نے کہا کہ ’دوسری جانب اب خواتین بھی معاشی طور پر خود مختار ہوگئی ہیں، پہلے وہ طلاق لینے سے پہلے سوچتیں تھیں کہ اگر طلاق ہوگئی تو کہاں جاؤں گی لیکن اب وہ معاشی طور پر آزاد ہونے کے بعد یہ سوچتی ہیں کہ وہ خود کمالیں گی اور بچوں کی بھی پرورش کرلیں گی ‘۔