بالی ووڈ فلم انڈسٹری کے ورسٹائل اداکار نواز الدین صدیقی کی اہلیہ عالیہ نے ساس مہرالنساء صدیقی کی جانب سے جائیداد کے تنازع پر درج کروائے گئے مقدمے پر اپنے ردِ عمل کا اظہار کیا ہے۔

عالیہ نے سوشل میڈیا کی فوٹو اینڈ ویڈیو شئیرنگ ایپ انسٹا گرام پر جائیداد کے تنازع کے بارے میں پولیس پر تنقید کی۔

اُنہوں نے اپنی پوسٹ میں لکھا ہے کہ “یہ میرے لیے بہت حیران کُن بات ہے کہ  میرے شوہر کے خلاف میری شکایات پر پولیس نے توجہ نہیں دی تاہم جیسے ہی میں اپنے شوہر کے گھر میں داخل ہوتی ہوں اور چند گھنٹوں میں میرے خلاف فوری طور پر ایک مجرمانہ شکایت درج کر لی جاتی ہے”۔

اُنہوں نے سوالیہ انداز میں لکھا ہے کہ “کیا مجھے اس طرح انصاف ملے گا”؟

یہ بھی پڑھیں: جائیداد کا تنازعہ؛ نواز الدین صدیقی کی والدہ نے بہو پر مقدمہ کردیا

واضح رہے کہ نواز الدین صدیقی کی والدہ مہرالنساء صدیقی نے ویرسوا پولیس اسٹیشن میں اپنی بہو عالیہ کے خلاف تعزیرات ہند کی دفعہ 452، 323 اور 504 کے تحت مقدمہ درج کروایا۔

 ویروسوا پولیس نے عالیہ کو نواز الدین صدیقی کی والدہ سے جائیداد کے تنازع پر جھگڑے کے الزام میں پوچھ گچھ کے لیے بلوایا۔

خیال رہے کہ عالیہ نواز الدین کی دوسری بیوی ہیں، اُن کا اصل نام انجنا کشور پانڈے ہے، دونوں نے ایک دہائی قبل شادی کی تھی جس سے اُن کے دو بچے ہیں۔

یہ بھی پڑھیں: اداکار نواز الدین صدیقی نے بھاری معاوضہ لینے والے فنکاروں کو آڑے ہاتھوں لے لیا