پاکستان کی معروف اداکارہ حریم فاروق نے ساتھی اداکارہ صبا قمر کی تعریفوں کے پل باندھ دیے۔

حال ہی میں پاکستان کی معروف اداکارہ حریم فاروق نے ساتھی اداکارہ صبا قمر کے ہمراہ ایک نجی ٹی وی چینل کے شو میں شرکت کی جہاں انہوں نے اپنا نیا آنے والا ڈرامہ ’ سر راہ ‘ سے متعلق گفتگو کی۔

اداکارہ حریم فاروق نے کہا کہ حالیہ ڈرامہ جو میں نے صبا قمر کے ہمراہ کیا وہ صرف اس لیے کیا کیونکہ مجھے صبا قمر کے ساتھ اسکرین شیئر کرنی تھی۔

انہوں نے کہا کہ پروجیکٹ صبا قمر کی وجہ سے سائن کیا، پہلے مجھے کہانی پسند آئی پھر ٹیم نے بتایا کہ صبا رانیہ کا کردار کر رہی ہیں تو میں نے فوراً کہا کہ ہاں میں یہ کروں گی۔

حریم فاروق نے کہا کہ میں نے صبا قمر کے بارے میں بہت سنا ہوا تھا، ان کے کام کے بارے میں بھی سنا ہوا تھا، اور جب میں نے ان کے ساتھ کام کیا تو بہت اچھا لگا کیونکہ مجھے ایسا لگا ہی نہیں کہ ہم اداکاری کر رہے ہیں، مجھے ایسا لگ رہا تھا کہ سب حقیقت میں ہو رہا ہے۔

اداکارہ حریم فاروق نے کہا کہ مجھے صبا میں ایک بہت اچھی دوست ملی، صبا جذباتی ہے اور وہ سب کے لیے ہمدردی رکھتی ہے۔