پاکستان کے سپر اسٹار فیصل قریشی نے تین مشہور اداکاروں کے بارے میں بتایا ہے جن کو ڈانس کرنا نہیں آتا۔

حال ہی میں پاکستان کے معروف اداکار فیصل قریشی نے ایک نجی ٹی وی چینل کے شو میں شرکت کی جہاں میزبان کی جانب سے سوال کیا گیا کہ انڈسٹری میں سب سے اچھا ڈانس کون کرتا ہے؟ عثمان خالد بٹ، گوہر رشید یا پھر محسن عباس حیدر؟

سوال کے جواب میں معروف اداکار فیصل قریشی کا کہنا تھا کہ تینوں کو ڈانس کرنا نہیں آتا۔

اس سے قبل اپنے دیے گئے ایک انٹرویو میں اداکار اور میزبان فیصل قریشی کا کہنا تھا کہ جس طرح بچوں کی پہلے گھر میں عزت کی جاتی ہے تو اس کی محلے میں عزت ہوتی ہے، اسی طرح فنکاروں کی بھی جب ملک میں عزت ہوگی تو دوسرے ممالک بھی عزت کریں گے۔

انہوں نے کہا تھا کہ دوسرے ممالک پاکستانی شوبز شخصیات کو بطور مہمان اس لیے نہیں بلاتے کیوںکہ اپنے ہی ملک میں شوبز شخصیات کو اس طرح عزت نہیں دی جاتی جس کی وہ حقدار ہوتی ہیں۔

یہ بھی پڑھیں: والد سے بچھڑنے کے بعد بہت تکلیف دہ وقت گزارا؛ فیصل قریشی

ان کا کہنا تھا کہ بھارت میں شوبز شخصیات کی عزت کی جاتی ہے جس وجہ سے انہیں دوسرے ممالک بھی تقریبات میں مدعو کرتے ہیں۔

فیصل قریشی نے کہا تھا کہ پاکستانی شناخت کے حوالے سے تذبذب کا شکار ہیں، ہم لوگ پورا دن فیس بک اور ٹوئٹر پر ہندوستتان کو گالیاں دیتے رہتے ہیں مگر گھروں میں ہونے والی تمام تقریبات میں وہاں کے ہی گانوں پر ڈانس کر رہے ہوتے ہیں۔

انہوں نے کہا تھا کہ ہمارے ہاں ٹی وی چینلز کے پروگرامات میں بھی بھارتی گانے چلائے جاتے ہیں اور جب 13 سال قبل انہوں نے اپنے پروگرام میں انڈین گانے نہ چلانے کا اعلان کیا تھا تو لوگوں ان پر طنز کی اور سوال کیا کہ وہ اپنا شو کیسے چلائیں گے؟

یہ بھی پڑھیں: فیصل قریشی کی پسندیدہ اداکارہ کون ہیں؟ اداکار نے بتادیا

ان کا کہنا تھا کہ حالت یہ ہے کہ حال ہی میں ایک ٹی وی چینل نے فون کر کے ان سے پوچھا کہ پاکستان میں شاہ رخ خان کی فلم پٹھان نہیں ریلیز کی جا رہی تو اس پر اداکار کا کیا خیال ہے؟

فیصل قریشی نے بتایا تھا کہ انہوں نے ٹی وی چینل کو جواب دیا کہ پہلے انہیں پٹھان کا مقدمہ لڑنے کا کمیشن دیا جائے تو وہ مذکورہ معاملے پر بات کریں گے ورنہ ان کا کیا کام؟