معروف اداکار جیکی چن کی فلموں کو دنیا بھر میں دیکھا اور پسند کیا جاتا ہے۔

ان کی فلموں کی ایک خاص اور منفرد بات یہ ہے کہ ان کی تمام فلموں کا اختتام شوٹنگ کے دوران ہونے والی مزاحیہ غلطیوں اور حادثات پر مبنی بلوپر ریل پر ہوتا ہے۔

اب یہاں سوال یہ اُٹھتا ہے کہ اس طرح اختتام کے پیچھے کیا وجہ ہو سکتی ہے؟

1982 کی فلم ڈریگن لارڈ جیکی چن کی پہلی فلم تھی جس میں ناکام اسٹنٹس اور دیگر غلطیوں کو فلم کے اختتام پر دکھایا گیا جس کے بعد ایشیائی سپر اسٹار کی ہر فلم کا اختتام اس طرح ہونا روایت بن گیا۔

اس بارے میں کہا جاتا ہے کہ فلم کے ایک اسٹنٹ کی شوٹنگ کے دوران جیکی چن نے غلطی سے اپنا سر لوہے کی سلاخ پر دے مارا تھا۔

اس وقت جب اداکار تکلیف کے باعث نیچے گر گئے تھے تو کیمرا مین نے فوٹیج کو ریکارڈ کرلیا اور پھر اسے فلم کے آخر میں بلوپر ریل کی شکل میں چلا دیا گیا، جو اتنی مقبول ہوئی کہ اس کے بعد اداکار کی دیگر فلموں میں بھی ایسا کیا جانے لگا۔

اس حوالے سے معروف اداکار جیکی چن کا کہنا ہے کہ ’ ان کی تمام فلمیں ایک مخصوص فارمولے پر مبنی ہوتی ہیں، تمام فلموں میں ایسے مخصوص عناصر ہونا ضروری ہوتے ہیں جن کو دیکھ کر ناظرین کو احساس ہو کہ وہ جیکی چن کی فلمیں دیکھ رہے ہیں ‘۔