بالی ووڈ کے کامیاب ترین ہدایت کار اور پروڈیوسر سنجے لیلا بھنسالی کی نئی  ویب سیریز ’ہیرا منڈی‘ کی پہلی جھلک جاری کر دی گئی۔

ٹیزر میں اداکارہ سوناکشی سنہا، ادیتی راؤ حیدری، منیشا کوئرالا، شرمین سہگل، سنجیدہ شیخ اور ریچا چڈھا کو دیکھا جا سکتا ہے جوکہ اس سیریز میں مرکزی کردار ادا کر رہی ہیں۔

نیٹ فلکس کی جانب سے سے جاری کئے گئے ٹیزر کے پوسٹر میں دیکھا جا سکتا ہے کہ تمام طوائفیں ملکہ کے روپ میں نظر آ رہی ہیں اور سب نے سنہری لباس و زیورات پہنے ہوئے ہیں۔

سنجے لیلا بھنسالی کا اس حوالے سے کہنا ہےکہ بطور فلمساز ہیرامنڈی میرے سفر کا ایک اہم سنگ میل ہے، یہ لاہور کی طوائفوں پر بننے والی اپنی نوعیت کی ایک منفرد فلم ہوگی، ہیرامنڈی جسے لاہور کا بازار حسن کہا جاتا ہے، اس ویب سیریز کی کہانی بھی اسی بازار حسن سے منسلک خواتین کی زندگی پر مبنی ہے۔

یہ بھی پڑھیں: سنجے لیلا بھنسالی کا عالیہ بھٹ کی پیشکش قبول کرنے سے انکار

معروف فلمساز نے ہیرا منڈی کو مشکل ترین منصوبہ بھی قرار دیا تاہم ساتھ ہی امید ظاہر کی کہ وہ اسے توقعات کے مطابق پورا کریں گے۔

واضح رہےکہ سنجے لیلا بھنسالی بالی ووڈ کو دیوداس ، باجی راؤ مستانی، گنگو بائی، رام لیلا اور ہم دل دے چکے صنم جیسی سہر ہٹ فلمیں دے چکے ہیں۔