پاکستان شوبز انڈسٹری کی مشہور و معروف اداکارہ عتیقہ اوڈھو نے حکومتِ پاکستان سے بڑا مطالبہ کردیا ہے۔

اداکارہ عتیقہ اوڈھو نے جدہ میں اپنے اعزاز میں تقریب سے خطاب کرتے ہوئے کہا کہ پاکستان میں ایسے ڈرامے اور فلمیں بنانے کی اشد ضرورت ہے جو نہ صرف ثقافتی طور پر قابل قبول ہوں بلکہ انہیں عربی زبان میں ڈب بھی کیا جا سکے تاکہ وہ سعودی عرب کے چینلوں پر چلائے جاسکیں اور مقامی لوگ اسے انجوائے کر سکیں۔

ان کا کہنا تھا کہ مجھے لگتا ہے کہ اب وقت بدل چکا ہے اور ہم اپنے مواد کو صرف دنیا بھر میں مقیم پاکستانیوں تک محدود نہیں رکھ سکتے، بین الاقوامی سطح پر تفریحی مواد کو مختلف زبانوں میں ڈب کیا جا رہا ہے جسے پوری دنیا میں دلچسپی سے دیکھا جا رہا ہے۔

یہ بھی پڑھیں: اداکارہ عتیقہ اوڈھو نے عمرے کی سعادت حاصل کرلی

انہوں نے کہا کہ میں نے ریاض میں متعلقہ سعودی حکام سے درخواست کی ہے کہ پاکستانی ڈراموں کو عربی زبان میں ڈب کر کے انہیں سعودی چینلوں پر ٹیلی کاسٹ کرنے کے لیے یہاں لایا جائے۔

اداکارہ عتیقہ اوڈھو کا کہنا تھا کہ پاکستان کی فلم انڈسٹری نے سعودی عرب سمیت پوری دنیا میں اپنا لوہا منوایا ہے اور اپنے غیر معمولی کام سے زرمبادلہ کمایا ہے۔

یہ بھی پڑھیں: عتیقہ اوڈھو نے نوجوان خواتین کو اہم مشورہ دے دیا

انہوں نے کہا کہ صحافی بیرونی دنیا میں پاکستان کی ثقافت کو متعارف کرانے میں اہم کردار ادا کر رہے ہیں۔

ان کا مزید کہنا تھا کہ حکومتِ پاکستان کو اب شوبز انڈسٹری کی حمایت اور سرپرستی کے لیے اپنا کردار ادا کرنا چاہیے۔

یہ بھی پڑھیں: عتیقہ اوڈھو کو تیسری شادی کا مشورہ کس نے دیا تھا؟ اداکارہ نے بتادیا