پاکستان شوبز انڈسٹری کی مشہور و معروف اداکارہ سبینہ فاروق کو دھمکیاں ملنے لگ ہیں۔

حال ہی میں اداکارہ سبینہ فاروق نے سوشل میڈیا کی فوٹو اینڈ ویڈیو شیرنگ ایپ انسٹا گرام پر ایک اسٹوری پوسٹ کی جس میں اُن کا کہنا تھا کہ معروف ڈراما ’تیرے بن‘ میں حیا کا کردار ادا کرنے پر انہیں ان کے کردار کے حوالے سے دھمکیاں دی جارہی ہیں۔

انہوں نے کہا کہ میں ڈراما ’تیرے بن‘ میں اپنے کردار سے متعلق آپ کی بنائی ہوئی میمز کا مزاح لے رہی تھی لیکن ہر چیز کی ایک حد ہوتی ہے۔

ان کا کہنا تھا کہ یوٹیوب پر جعلی اور بیہودہ مواد ڈالا جارہا ہے اور مجھے دھمکیاں دی جارہی ہیں، یہ میرے اور میرے خاندان کے لیے پریشان کن ہے، “حیا” صرف ایک کردار ہے۔

اداکارہ سبینہ فاروق نے کہا کہ میں درخواست کرتی ہوں کہ اپنا غصہ مجھ پر نکالنا بند کریں اور میں ان لوگوں پر لعنت بھیجتی ہوں جو جعلی یوٹیوب ویڈیوز بنا کر کماتے ہیں۔

انہوں نے مزید کہا کہ اگر میں اتنی بُری ہوں تو مجھے فالو کرنا بند کریں اور ڈرامے میں حیا کے کردار نہ دیکھیں، اگر مجھے مزید کوئی دھمکی دی گئی تو میں نام اور ان کے یوٹیوب چینلز ظاہر کر کے سب کو دکھاؤں گی اور پوسٹ کروں گی۔