پاکستان شوبز انڈسٹری کے مشہور و معروف اداکار عمران عباس نے کہا ہے کہ جب ضمیر نہیں کانپتے تو زمین کانپ جاتی ہے۔

گزشتہ روز اسلام آباد سمیت ملک کے مختلف شہروں میں زلزلے کے شدید جھٹکے محسوس کیے گئے جس کے نتیجے میں 9 افراد جاں بحق اور درجنوں افراد زخمی ہونے کی اطلاعات موصول ہوئیں۔

دارالحکومت اسلام آباد سمیت پنجاب، خیبر پختونخوا، بلوچستان، آزاد کشمیر اور گلگت بلتستان کے مختلف شہروں میں زلزلے کے شدید جھٹکے محسوس کیے گئے ہیں۔

پشاور، لاہور، کوہاٹ، صوابی، بہاول پور، لودھراں، ڈی جی خان، میانوالی، خانیوال، ٹوبہ ٹیک سنگھ، پارا چنار اور کرک میں بھی زلزلے کے جھٹکے محسوس کیے گئے ہیں۔

یہ بھی پڑھیں: زلزلے کے خوف نے ایک شخص کی جان لے لی

زلزلہ پیما مرکز کے مطابق زلزلے کی شدت 6.8 سے لے کر 7.7 تھی جبکہ مرکز افغانستان سے 90 کلو میٹر دور ہندوکش پہاڑی سلسلہ تھا۔

صوبائی ڈیزاسٹر منیجمنٹ اٹھارٹی خیبر پختونخوا کے مطابق زلزلے کی گہرائی 180 کلو میٹر زیر زمین تھی۔

اس حوالے سے معروف اداکار عمران عباس نے سوشل میڈیا کی فوٹو اینڈ ویڈیو شیئرنگ ایپ انسٹاگرام پر ایک اسٹوری پوسٹ کی جس میں اُن کا کہنا تھا کہ “جب ضمیر نہیں کانپتے تو زمین کانپ جاتی ہے”۔

انہوں نے کہا کہ “اللہ کے عذاب سے ڈرو، یہ ظلم یہ جبر چھوڑ دو،  نہ جانے کتنے لوگوں پر ظلم کی انتہا کر رہے ہو، کتنوں کی جان لے رہے ہو اور کس کس کی جان لینے کی سازش کررہے ہو”۔

ان کا کہنا تھا کہ “کیوں موت کو بھول بیٹھے ہو، توبہ کرو اور پھر سوچ لو کہ اللہ چاہے تو ایک لمحے میں تم سب کو بھی مٹی کے ڈھیر میں دفن کرسکتا ہے”۔

عمران عباس نے مزید لکھا کہ “وقت ہے پھر سوچ لو، کہیں ایسا نہ ہو کہ توبہ کی فرست بھی نہ ملے”۔