سابق بھارتی ٹینس اسٹار اور شعیب ملک کی اہلیہ ثانیہ مرزا رمضان المبارک کے آغازسے قبل فیملی کے ہمراہ ادائیگی عمرہ کے لیے روانہ ہوئیں۔

ثانیہ مرزا نے فوٹو اینڈ ویڈیوشیئرنگ پلیٹ فارم انسٹاگرام پر والدین، بہن انعم مرزا، بہنوئی اسد اور دیگرکے ہمراہ مدینہ منورہ سے دلکش تصاویرشیئرکیں۔

بیٹے اذہان مرزاملک کے ساتھ مسجد نبوی کے صحن میں کھنچوائی گئی دلکش تصویرسے آغازکرنے والی ثانیہ نے کیپشن میں اپنی دعاؤں کی قبولیت کی دُعا مانگی۔

تصاویرمیں اذہان کے علاوہ ثانیہ کی چھوٹی بہن انعم مرزا کی بیٹی بھی موجود ہے۔

ثانیہ مدینہ منورہ کے بعد ادائیگی عمرہ کے لیے مکہ مکرمہ روانہ ہوں گی، انہوں نے عبایا کی فراہمی پر انسٹا اسٹوریزمیں شوبزکو خیرباد کہہ کراسلامی شعائر کے مطابق زندگی گزارنے والی بھارتی اداکارہ ثناء خان کا شکریہ بھی ادا کیا۔

یہ بھی پڑھیں: ٹینس اسٹار ثانیہ مرزا نے کرکٹر امام الحق کا شکریہ کیوں ادا کیا؟

مدینہ منورہ میں ثانیہ اور فیملی نے جس ہوٹل میں قیام کیا ان کی جانب سے بھی بھارتی ٹینس اسٹار کو بھرپور خوش آمدید کیا گیا ہے۔

انہوں نے ہوٹل کی جانب سے دیے جانے والے کیک کی تصویر بھی شیئرکرتے ہوئے ہوٹل اورٹورکمپنی کا شکریہ ادا کیا۔