آج ہم آپکو بتائیں گے معروف بھارتی ڈرامہ سیریل ‘کیونکہ ساس بھی کبھی بہو تھی’ میں اداکارہ سمرتی ایرانی کو کتنا معاوضہ ملتا تھا۔

ڈرامے میں ‘تُلسی’ کا مرکزی کردار نبھانے والی اداکارہ سمرتی ایرانی نے اپنے دیے گئے ایک انٹرویو میں بتایا کہ جس وقت شو شروع ہوا اس وقت میرے حالات کچھ اچھے نہیں تھے، نہ میرے پاس اتنے پیسے ہوا کرتے تھے، ڈرامے کے شروع کے ایک سال مجھے یومیہ معاوضہ ملا کرتا تھا۔

انہوں نے کہا کہ مجھے پہلے سال دن کے 1800 بھارتی روپے ملا کرتے تھے اور میرے پاس سیٹ پر آنے کے لیے گاڑی بھی نہیں تھی۔

ان کا کہنا تھا کہ اس وقت میرے کیمرا مین کے پاس گاڑی ہوا کرتی تھی، وہ ہمیشہ مجھے کہتا کہ گاڑی لے لو، مجھے شرم آتی ہے کہ میں گاڑی پر آتا ہوں اور تُلسی بھابھی رکشے پر سیٹ پر آتی ہیں۔

اداکارہ سمرتی ایرانی نے بتایا کہ ایک مرتبہ میرا نام مس انڈیا کے مقابلے کے لیے آیا مجھے اس میں حصہ لینے کے لیے ایک لاکھ روپے کی ضرورت تھی، میں نے اپنے والد سے ادھار مانگے جس پر والد نے کہا کہ میں ایک شرط پر پیسے ادھار دوں گا، یہ پیسے مجھے سود سمیت لوٹانے ہوں گے، اگر ایسا نہ ہوا تو میں تمہاری شادی اپنی پسند کے لڑکے سے کردوں گا۔

انہوں نے کہا کہ میں نے یہ آفر قبول کرلی، جب مس انڈیا کے مقابلے سے لوٹی تو میرے پاس 60 ہزار روپے تھے جو میں نے والد کو دیے، باقی رقم کے لیے مجھے کچھ کرنا تھا، میں معروف فاسٹ فوڈ کے ریسٹورینٹ گئی تو وہاں کلینر جسے جھاڑو، پوچھا اور برتن دھونے تھے، کی ضرورت تھی، میں اس نوکری کو کرنے کے لیے میں رضامند ہوگئی، وہاں مجھے ماہانہ 1500 روپے ملتے تھے۔