جنوبی کوریا کی اداکارہ اور ماڈل جونگ چائی یل 26 سال کی عمر میں انتقال کر گئیں۔

 غیر ملکی میڈیا رپورٹس کے مطابق اداکارہ کی مینجمنٹ ایجنسی نے جونگ چائی یل کی موت کی تصدیق کرتے ہوئے بتایا کہ اداکارہ گزشتہ روز انتقال کر گئیں تاہم ابھی تک موت کی وجہ سامنے نہیں آئی۔

 رپورٹ میں بتایا گیا کہ اداکارہ اس وقت ایک ویب ناول بیسڈ ڈرامے”  ویڈنگ امپوسبل”  میں کام کر رہی تھی اور اداکارہ کی موت کی خبر پر ” ویڈنگ امپوسبل”  کی کاسٹ اور دیگر عملے نے حیرت کا اظہار کرتے ہوئے کام روک دیا۔

 واضح رہے کہ جونگ چائی یل پہلی مرتبہ 2016 میں ایک پروگرام کے ذریعے منظر عام پر آئیں اور پھر اداکارہ نے 2018 میں فلم “ڈیپ “کے ذریعے اپنے کیرئیر کا آغاز کیا۔

وہ نیٹ فلکس کی ویب سیریز “زومبی ڈیٹیکٹیو” میں اداکاری سے مشہور ہوئیں۔