پاکستان شوبز انڈسٹری کے مشہور اداکار و گلوکار ہارون شاہد نے بتادیا کہ اُن کو کس شہر کا کھانا زیادہ پسند ہے۔

حال ہی میں اپنے دیے گئے ایک انٹرویو میں اداکار ہارون شاہد نے کراچی اور لاہور کی زندگی میں فرق پر بات کی۔

انہوں نے کہا کہ مجھے کراچی کا حال دیکھ کر دُکھ ہوتا ہے، یہ میرے ملک کا حصہ ہے کراچی کے لوگوں کے ساتھ زیادتی ہو رہی ہے، یہاں پر سب کچھ ہے یہ ایسا شہر ہے جو ہم سب کو پناہ دیتا ہے۔

ان کا کہنا تھا کہ میں جب لاہور سے کراچی آرہا تھا تو سوچ رہا تھا کہ میرا کیا بنے گا، کام ملے گا یا نہیں، لیکن میں دیکھ رہا ہوں کہ اس شہر نے اپنی باہیں کھول رکھی ہیں کہ آجاؤ میں تمہیں کام دوں گا۔

اداکار کے مطابق کراچی میں ہر نسل کا آدمی موجود ہے اور یہی وجہ ہے کہ یہاں پر کچھ بےحد کمال چیزیں ہیں جیسے کراچی کا کھانا پورے پاکستان میں سب سے اچھا کھانا ہے۔

ہارون شاہد کا کہنا تھا کہ یہ غلط فہمی ہے کہ لاہور کا کھانا بہت اچھا ہے، لاہوری کھاتے زیادہ ہوں گے مگر کھانا صرف کراچی کا اچھا ہے۔

انہوں نے کہا کہ سب سے زیادہ محنتی لوگ بھی کراچی میں ہیں لیکن اس کے ساتھ کراچی میں وہ چیزیں بھی نظر آتی ہیں جو پورے پاکستان میں نہیں نظر آتیں۔

ان کا کہنا تھا کہ کراچی میں بدمعاشی زیادہ نظر آتی ہے، یہ کہتے ہوئے بُرا لگتا ہے مگر تعصب یہاں زیادہ نظر آئے گا لیکن چاہے کچھ بھی ہو آپ کراچی سے محبت کرنے سے خود کو چاہتے ہوئے بھی نہیں روک سکتے یہ ایسا شہر ہے۔