پاکستان شوبز انڈسٹری کی مشہور و معروف اداکارہ اشنا شاہ نے کہا ہے کہ وہ گھریلو تشدد کو مثبت انداز میں پیش کرنے والے کردار ادا نہیں کریں گی۔

حال ہی میں اپنے دیے گئے ایک انٹرویو میں اداکارہ اشنا شاہ نے کہا کہ بیچاری اور مظلوم عورت کے کردار ادا کرتے ہوئے وہ ڈراموں میں اتنا روئی ہیں کہ ان کی آنکھیں رو رو کر تھک چکی ہیں۔

ان کا کہنا تھا کہ اب کچھ بھی ہوجائے وہ گھریلو تشدد کو اچھی چیز کے طور پر پیش کرنے والے کردار نہیں نبھائیں گی۔

اشنا شاہ نے کہا کہ بطور اداکارہ اب وہ میچوئر ہو چکی ہیں، ان کی اداکاری بھی بہتر ہوئی اور اب مقبول ہوجانے کی وجہ سے بہت سارے غلط کرداروں کو مسترد بھی کر سکتی ہیں۔

اداکارہ نے ساس اور بہو کے جھگڑوں کے درمیان بنائے جانے والے ڈراموں سے متعلق بات کرتے ہوئے کہا کہ اس بات میں کوئی دو رائے نہیں کہ اچھے ڈرامے بننے چاہئیں اور دوسری کہانیاں بھی آنی چاہئیں لیکن پروڈیوسرز اپنا پیسہ ڈبونا نہیں چاہتے، اس لیے وہ ایسے ڈراموں میں سرمایہ کاری کرتے ہیں جس سے انہیں کمائی ہو۔

انہوں نے کہا کہ ایک طرح سے ایسے ڈرامے بنانا مجبوری بھی ہے کیونکہ انڈسٹری کو مضبوط اور بہتر بنانے کے لیے فی الحال ایسا ہی کرنا پڑے گا۔

پاکستان شوبز انڈسٹری کی مشہور و معروف اداکارہ اشنا شاہ نے بتایا کہ جلد ہی وہ ایک ڈرامے میں خود مختار اور مضبوط خاتون کے کردار میں دکھائی دیں گی، جس میں انہوں نے زائد العمر خاتون کا روپ دھارا ہے جبکہ وہ ڈرامے میں اپنے شوہر سے زیادہ کامیاب اور پیسے کمانے والی ہوتی ہیں۔