پاکستان شوبز انڈسٹری کے مشہور و معروف اداکار عثمان خالد بٹ ایک بار پھر خواتین کے حق میں بول پڑے ہیں۔

حال ہی میں اداکار عثمان خالد بٹ نے انسٹاگرام پر ایک ویڈیو پوسٹ کی جس میں اُن کو مزاحیہ انداز میں عورتوں کو تاڑنے والے مرد حضرات پر تنقید کرتے ہوئے دیکھا جاسکتا ہے۔

انہوں نے کہا کہ ہمارے معاشرے میں ’گھوری ٹائٹس‘ نامی وبا پھیلی ہوئی ہے، جس کے تحت مرد حضرات کو خواتین کو بلاوجہ گھورنے اور تاڑنے کی بیماری لگ جاتی ہے، وہ راہ چلتے ہوئے، مارکیٹس میں اور بازاروں میں خواتین کو گھورتے رہتے ہیں۔

ان کا کہنا تھا کہ ایسی بیماری میں مبتلا مرد حضرات شلوار قیمض یا پینٹ شرٹ پہنی ہوئی خاتون کو تاڑتے رہتے ہیں اور انہیں کوئی شرم نہیں آتی۔

ویڈیو میں اداکار نے خواتین کو تاڑنے والے مرد حضرات کی مردانگی پر مزاحیہ انداز میں لعنت بھی بھیجی۔

خالد عثمان بٹ نے مرد حضرات کو مشورہ دیا کہ وہ ’گھوری ٹائٹس‘ نامی بیماری یعنی خواتین کو تاڑنے کے مرض سے بچنے کے لیے اپنے نفس پر قابو پائیں۔

انہوں نے مرد حضرات کو بتایا کہ آنکھوں کی گستاخیاں اس وقت ہی معاف ہوتی ہیں جب دونوں افراد رضامند ہوں، اس لیے ایسے مرد حضرات اپنی آنکھوں اور نفس پر قابو رکھیں۔

خالد عثمان بٹ نے مرد حضرات کو کہا کہ وہ خواتین کو عزت اور چین سے جینے دیں، وہ انہیں گلی، محلوں، بازاروں اور راہ جاتے ہوئے گھورنا بند کریں۔

واضح رہے کہ معروف اداکار عثمان خالد بٹ ہمیشہ خواتین کی خودمختاری کے حوالے سے کھل کر آواز بلند کرتے آئے ہیں۔