پاکستان شوبز انڈسٹری کی مشہور و معروف اداکارہ سائرہ یوسف نے بتادیا کہ وہ کیسے منصوبوں میں کام کرنا پسند نہیں کرتیں۔

حال ہی میں اپنے دیے گئے ایک انٹرویو میں اداکارہ سائرہ یوسف کا کہنا تھا کہ بیٹی سے دوری کے خیال سے انہوں نے متعدد منصوبوں میں کام نہیں کیا اور ابھی تک وہ ایسے منصوبوں میں کام کرنا پسند نہیں کرتیں جن کی وجہ سے بیٹی سے دور رہنا پڑے۔

ان کا کہنا تھا کہ انہیں بیٹی کی دوری کی وجہ سے منصوبوں کو چھوڑنے پر کوئی افسوس نہیں، وہ ہمیشہ اس طرح کام کرتی ہیں کہ ان کی ذاتی زندگی ڈسٹرب نہ ہو۔

انہوں نے کہا کہ ان کا ایسا کوئی ڈراما یا پروجیکٹ نہیں ہے، جس پر انہیں پچھتاوا ہو، انہیں تمام ڈراموں اور فلموں میں کام کر کے مزہ آیا۔

سائرہ یوسف نے اپنی فلم ’بے بی لیشس‘ سے متعلق بتایا کہ مذکورہ فلم ابتدائی طور پر مختصر فلم کے طور پر بنائی جانی تھی لیکن بعد میں اسے فیچر فلم بنایا گیا اور اس کے اسکرپٹ کو متعدد بار تبدیل کیا گیا۔

ان کا کہنا تھا کہ ’بے بی لیشس‘ کی شوٹنگ پانچ سال تک چلی اور دو سال تک کورونا کی وجہ سے فلم کی شوٹنگ بند رہی۔

اداکارہ نے کہا کہ فلم کی شوٹنگ کے دوران انہیں بہت کچھ سیکھنے کو ملا اور یہ کہ انہیں پہلے فلم کے نام پر اعتراض تھا لیکن بعد میں فلم بن جانے کے بعد انہیں فلم کے نام کا مطلب سمجھ آگیا۔

واضح رہے کہ سائرہ یوسف اور شہروز سبزواری نے 2012 میں شادی کی تھی اور دونوں کی ایک بیٹی نورے ہے۔

دونوں کے درمیان مارچ 2020 میں طلاق ہوگئی تھی، جس کے چند ہفتوں بعد شہروز سبزواری نے ماڈل صدف کنول سے شادی کی تھی۔