پاکستان شوبز انڈسٹری کی مشہور و معروف اداکارہ مہوش حیات 7 سال بعد چھوٹی اسکرین پر دکھائی دیں گی۔

حال ہی میں اپنے دیے گئے ایک انٹرویو میں اداکارہ مہوش حیات نے ڈراموں سے دوری پر کھل کر بات کی اور ساتھ ہی اپنے فلمی کیریئر کے حوالے سے بھی گفتگو کی۔

انہوں نے کہا کہ وہ کام کے سلسلے میں اگرچہ کافی عرصے تک بیرون ملک رہ سکتی ہیں لیکن وہ کبھی پاکستان کو چھوڑ نہیں سکتیں۔

ان کا کہنا تھا کہ ان کے یہاں روٹس ہیں، ان کا گھر اور وطن ہے، وہ اگر دوبارہ بھی ہولی ووڈ میں کام کرنے جائیں تو بھی وہ واپس پاکستان آئیں گی۔

اداکارہ نے لکھاری خلیل الرحمٰن قمر کے اسکرپٹ کی تعریفیں کرتے ہوئے کہا کہ وہ اس طرح ڈائلاگ لکھتے ہیں کہ ان میں اداکاری کرتے وقت زیادہ محنت نہیں کرنی پڑتی۔

مہوش حیات نے بتایا کہ خلیل الرحمٰن قمر کا اسکرپٹ اداکاروں کے لیے ایک طرح کی ’ٹریٹ‘ ہوتی ہے اور ان کی لکھی گئی فلموں اور ڈراموں کے ڈائیلاگ تک لوگوں کو یاد ہیں۔

انہوں نے کہا کہ وہ 7 سال بعد چھوٹی اسکرین پر واپسی کریں گی اور وہ اس لیے ڈراموں سے دور رہیں، کیونکہ اچھے اسکرپٹ نہیں لکھے جا رہے تھے۔

اداکارہ نے پاکستانی ڈراموں کے اسکرپٹ اور مواد پر مایوسی کا اظہار کرتے ہوئے کہا کہ انہیں جن کرداروں کی پیشکش ہو رہی تھی، وہ اتنے زیادہ اچھے نہیں تھے، اس لیے وہ چھوٹی اسکرین سے دور رہیں۔

ان کا کہنا تھا کہ ماضی میں بھی انہوں نے منتخب کرداروں میں کام کیا، انہوں نے خود مختار خاتون، بہادر اور نڈر لڑکی کے کردار کیے، تاہم انہوں نے بعض بیچاری اور مظلوم خاتون کے رول بھی کیے۔

مہوش حیات نے کہا کہ وہ ڈراموں میں ایک ہی طرح کے کرداروں کو بار بار نہیں کرنا چاہتیں، اس لیے بھی وہ ڈراموں سے دور رہیں لیکن اب 7 سال بعد وہ جلد ہی چھوٹی اسکرین پر دکھائی دیں گی۔