بالی وڈ اداکارہ کرشمہ کپور کا بیٹا کیان راج کپور والدہ کے ساتھ تصاویر نہ بنوانے پر سوشل میڈیا پر تنقید کی زد میں آگیا۔ 

بھارتی میڈیا رپورٹس کے مطابق کرشمہ کپور فیملی کے ہمراہ چھٹیاں گزار کر ممبئی واپس پہنچ گئیں تاہم ائیرپورٹ پر اداکارہ کے 13 سالہ بیٹے کیان راج کپور ناراض ناراض نظر آئے۔

رپورٹس میں بتایا گیا ہے کہ ائیرپورٹ پر اداکارہ نے بیٹے کو پاپارازی (فوٹوگرافر یا فوٹو جرنلسٹ) کے سامنے ساتھ تصاویر بنوا نے کا کہا لیکن بیٹے نے انکار کردیا۔

اس دوران فوٹوگرافر اور مداح تصاویر اور ویڈیوز بناتے رہے لیکن کیان راج کپور والدہ سے کتراتے رہے اور یہ مناظر کیمرے کی آنکھ سے فلمبند کرلیے۔

سوشل میڈیا پر کرشمہ اور ان کے بیٹے کی ویڈیو پر صارفین نے طرح طرح کے تبصرے کیے ہیں۔

کسی صارف نے بیٹے کے عمل کو ’ماں کی بے عزتی‘ قرار دیا تو کسی نے ’ناراضی‘ وجہ بتائی۔

تاہم کرشمہ کپور اور ان کے بیٹے کے درمیان ناراضی کی وجہ سامنے نہیں آ سکی ہے اور نہ ہی اس حوالے سے کوئی بیان جاری کیا گیا ہے۔