بالی ووڈ کی ہٹ ڈان سیریز کی نئی فلم میں اب شاہ رخ خان کی جگہ رنویر سنگھ ڈان کے روپ میں نظر آئیں گے لیکن اس تبدیلی کے اعلان میں ایک بار پھر تاخیر کردی گئی ہے۔

انڈسٹری میں چہ میگوئیاں کی جارہی ہیں کہ آج رنویر سنگھ کی سالگرہ کے موقع پر اس کا اعلان  فلم کے ہدایت کارفرحان اختر نے کرنا تھا لیکن ایک بار پھر یہ تاخیر کا شکار ہوگیا۔

بھارتی میڈیا نے اپنے ذرائع سے دعویٰ کیا کہ پٹھان اداکار ’ڈان‘ سیریز کی نئی فلم میں کام کیلئے راضی نہیں ہیں اور انہوں نے فلمساز کو باضابطہ طور پر انکار کردیا ہے۔

ذرائع کے مطابق ’ڈان 3‘ پروجیکٹ پر فرحان اختر، رتیش سدھوانی اور شاہ رخ خان کے درمیان طویل گفتگو ہوئی لیکن بالی وڈ کنگ نے فرنچائز میں دوبارہ کام کرنے سے معذرت کرلی ہے۔

اب فلم کے حوالے سے نئی پیشرفت سامنے آئی ہے کہ بالی اداکار رنویر سنگھ کو شاہ رخ خان کے آئیکونک رول کیلئے فائنل کرلیا گیا ہے اور وہ ہمیں ’ڈان 3‘ میں اداکاری کے جوہر دکھاتے نظر آئیں گے۔

رنویر سنگھ اس سے قبل ایکسیل انٹرٹینمنٹ کے ساتھ ’دل دھڑکنے دو‘ اور ’گُلی بوائے‘ جیسی فلموں میں شاندار پرفارمنس دے چکے ہیں۔