مراکشی نژاد بھارتی ڈانسر و اداکارہ نورا فتحی نے کہا ہے کہ انہیں بالی ووڈ میں اپنی جگہ بنانے کے لئے بہت محنت کرنی پڑی ہے۔

حال ہی میں اپنے دیے گئے ایک انٹرویو میں اداکارہ نورا فتحی نے بتایا کہ ماضی میں مالی ضروریات کو پورا کرنے کے لیے نہ صرف انہوں نے معیوب سمجھے جانے والے کام کیے بلکہ انہوں نے ’حقہ بار‘ میں ملازمت بھی کی جہاں وہ گاہکوں کو شیشہ اور دیگر چیزیں پیش کرتی تھیں۔

انہوں نے کہا کہ آج تک وہ بالی ووڈ سمیت دیگر گانوں پر پرفارمنس کرنے سے قبل کئی دن اور گھنٹے تک مشق کرتی رہتی ہیں اور شروع سے ہی ان کی ایسی عادت رہی ہے۔

ان کا کہنا تھا کہ انہیں کیریئر بنانے اور خود کو بطور ڈانسر منوانے کے لیے محنت کرنی پڑی، انہوں نے اس کے لیے کئی قربانیاں دیں، یہاں تک انہوں نے اپنے بھائی کی شادی میں بھی شرکت نہیں کی۔

نورا فتیحی نے کہا کہ جب انہوں نے 20 سال کی عمر میں مشکلات دیکھیں اور وہ اپنی عمر کی لڑکیوں کی طرح اس وقت زندگی کو انجوائے نہیں کرتی تھیں، ان کا کوئی بوائے فرینڈ یا دوست نہیں تھا، وہ خود کو ہر وقت کمرے میں بند رکھتی تھیں۔

انہوں نے کہا کہ وہ اس وقت بھی خود کو کمرے میں بند کر کے ٹی وی چلا کر ڈانس پر مشق کرتی تھی اور زبان سیکھتی تھیں۔

واضح رہے کہ نورا فتیحی نے 2014 میں بھارت میں ماڈلنگ، اداکاری و ڈانس کیریئر کا آغاز کیا اور اب تک وہ ہندی سمیت ملیالم، تیلگو اور تامل فلموں میں مختصر کرداروں سمیت ان میں آئٹم گانے کرچکی ہیں۔