بالی وڈ کی اداکارہ، ماڈل اور ماہر رقاصہ شلپا شیٹھی نے بھی اپنے شوہر راج کندرا کے نقش قدم پر چلتے ہوئے عوامی مقامات پر ماسک پہنا شروع کر دیا ہے۔

سوشل میڈیا پر شلپا شیٹھی کی ایک ویڈیو کافی وائرل ہو رہی ہے ، جس میں دیکھا جا سکتا ہےکہ وہ اپنے شوہر اور کاروباری شخصیت راج کندرا کے ہمراہ اپنے چہرے پر ماسک پہن کر گھوم رہی ہیں۔

اس جوڑے نے سیاہ رنگ کا لباس زیب تن کیا ہوا ہے اور ساتھ ہی دونوں نے اپنے چہروں کو ماسک سے ڈھانپ کر اپنی شنا خت پوشیدہ رکھنے کی بھی کوشش کی ہے۔

وائرل ویڈیو دیکھیں:

سوشل میڈیا پر صارفین کی جانب سے انہیں اس ’ماسک والے انداز‘ کی وجہ سے تنقید کا بھی سامنا کرنا پڑ رہا ہے۔

بھارتی میڈیا رپورٹس کے مطابق سوشل میڈیا پر یہ خبریں بھی گردش کر رہی ہیں کہ شلپا شیٹھی کا یہ نیا ماسک روپ راج کندرا کے فحش فلمیں بنانے کے تنازعے پر مبنی فلم ’یو ٹی  69 ‘کی تشہیری مہم کا حصہ ہے، جوکہ 3 نومبر کو ریلیز ہوگی۔

  واضح رہےکہ راج کندرا کو سال 2021 میں فحش فلمیں بنانے سے متعلق ایک مبینہ کیس میں گرفتار کیا گیا تھا جس کے لیے انہیں ممبئی کی آرتھر روڈ جیل میں بھی قید رکھا گیا۔

شوہر کی گرفتاری کے بعد پولیس نے شلپا شیٹھی کو بھی بیان ریکارڈ کروانے کے لیے طلب کیا تھا، جس میں انہوں نے شوہر راج کندرا پر فحش فلمیں بنانے کے الزامات کو مسترد کردیا تھا۔

پولیس نے اس تنازعے کے حوالے سے شلپا شیٹھی کے خلاف بھی تفتیش کی تھی، تاہم  ان کے فحش فلمیں بنانے میں ملوث ہونے کے شواہد سامنے نہیں آ سکے۔

 تین ماہ تک پولیس کی تحویل میں رہنے کے بعد راج کندرا کی ضمانت منظور کرلی گئی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/entertainment/2023/10/540681/amp/ کو لائک کریں