اس تصویر میں موجود پیاری سی یہ بچی آج کل کی کونسی مقبول پاکستانی اداکارہ ہیں؟

مذکورہ تصویر پاکستان شوبز انڈسٹری کو لاتعداد سپر ہٹ ڈرامے اور فلمیں دینے والی خوبصورت اور ورسٹائل اداکارہ ماہرہ خان کی ہے۔

پاکستان اور بھارت میں یکساں طور پر مقبول سپراسٹار ماہرہ خان نے گزشتہ روز انسٹاگرام پر اپنی یہ یاد گار تصویر شیئر کی، جس میں دیکھا جا سکتا ہے کہ وہ بچپن میں بھی بڑی بڑی آنکھوں والی خوبصورت بچی تھیں۔

ماہرہ خان نے پہلی شادی 2007 میں علی عسکری نامی شخص سے کی تھی، جن سے ان کا بیٹا اذلان ہے، شادی کے 8 سال بعد 2015 میں ان کی طلاق ہوگئی تھی۔

اپنے حالیہ انٹرویو میں ماہرہ خان نے پرانی یادوں کو یاد کرتے ہوئے بتایا کہ جب وہ چھوٹی عمر میں امریکا شفٹ ہوئیں تو انہیں کافی چیلنجز کا سامنا کرنا پڑا، انہیں پاکستان میں اپنی پڑھائی چھوڑنی پڑی، لیکن امریکا میں رہتے ہوئے انہیں آزادی کا حقیقی احساس اور اہداف طے کرنے کا موقع فراہم ہوا۔

اداکارہ نے یہ بھی بتایاکہ وہ ہمیشہ سے ہی کچھ منفرد اور بڑا کام کرنے کی خواہش رکھتی تھیں، اس وقت ان کی خواہش تھی کہ وہ بالی وڈ اسٹار شاہ رخ خان کے ساتھ بھی کام کریں اور اسی خواب کو پورا کرنے کے لیے انہوں نے محنت کی۔

ماہرہ خان نے سال 2017 میں بالی وڈ سپر اسٹار شاہ رخ خان کے مدمقابل فلم رئیس کرکے بھارت میں بھی اپنی خوبصورتی اور عمدہ فنکارانہ صلاحیتوں کا جادو جگایا۔

ماہرہ خان نے ڈرامہ شہرِ ذات، وہ ہمسفر تھا ، بن روئے، فلم مولا جٹ میں اپنی بہترین اداکاری کے جوہر دکھاکر شوبز انڈسٹری میں وہ مقام اور شہرت حاصل کی ہے جو بہت کم فنکاروں کے حصے میں آتی ہے۔

واضح رہے کہ رواں سال اکتوبر میں ماہرہ خان نے مری کے فائیو اسٹار ہوٹل پرل کانٹینینٹل بھوربن میں اپنے قریبی دوست اور نامور بزنس مین سلیم کریم سے دوسری شادی کی ۔

ماہرہ خان کی شادی کے بعد انہیں شوبز سمیت تمام ہی شعبہ ہائے زندگی سے تعلق رکھنے والے افراد کی جانب سے شادی کی مبارک باد پیش کی گئی اور نئے جوڑے کے لیے نیک تمناؤں کا اظہار کیا گیا۔